ОХУ-аас Хойд солонгосын нийслэл Пёньяны амьтны хүрээлэнд Африкийн арслан, хоёр хүрэн баавгай тэргүүтэй амьтдыг илгээжээ. Эдгээр амьтан нь ОХУ-ын ерөнхийлөгч Путины зүгээс хойд солонгосчуудад өгч буй бэлэг гэж Кремль Лхагва гаригт мэдэгдэв.

Амьтдыг нүүлгэн шилжүүлэх ажилд ОХУ-ын Байгалийн нөөцийн сайд Александр Козлов анхаарал тавьжээ. Москвагийн амьтны хүрээлэнгийн малын эмч нар мөн байлцаж, амьтдыг Пёньяны төв амьтны хүрээлэн рүү онгоцоор тээвэрлэв. Пёньяны төв амьтны хүрээлэнгээр хойд солонгос ажилчид Козловыг дагуулан явж буй бичлэгийг Оросын засгийн газраас нийтэлжээ.

ОХУ өнгөрсөн дөрөвдүгээр сард мөн Пёньяны амьтны хүрээлэнд амьтад бэлэглэж байв. Тухайн үед бүргэд, тогоруу, тоть зэрэг шувуу бэлэглэсэн. Харин Ким Жон Уны зүгээс Путинд Пунсан үүлдрийн хос нохой бэлэглэж байв.