Украинтай эв санаа нэг байгаагаа илэрхийлсэн олон зуун беларусь хүнийг баривчилжээ. “Виасна” хүний эрхийн тайланд дурдсанаар дор хаяж 1671 беларусь хүн баривчлагдсан бөгөөд тэдний тэдний 200-аас доошгүй нь хэт даврагч үзэл, төрийн эсрэг хуйвалдаанд буруутгагдаж, 1-25 хүртэл жилийн хорих ял авсан байна. Мөн хүмүүсийг эрүүдэн шүүж, хүмүүнлэг бус нөхцөлд хорьсон, торгосон, заримыг нь албадан сэтгэцийн эмчилгээнд хамруулсан гэж тайланд дурджээ.

Беларусь иргэдээс гадна украинчуудыг ч бас барьж хорьсон зүйл бий. Тус улс дор хаяж 12 украин иргэнийг хэт даврагч үзэл болон Украины аюулгүй байдлын агентлагуудтай холбоотой гэх үндэслэлээр буруутгаж, хорих ял оноосныг Беларусь дахь Киевийн Элчин сайд асан Ихор Кызым мэдэгджээ.

Беларусь нь Украинтай 1084 км хиллэдэг бөгөөд соёл, түүхийн эртний харилцаа холбоотой. Беларусийн өмнөд хэсэгт төрөл төрөгсөд нь амьдардаг украин хүн олон.

Ирэх оны нэгдүгээр сард Беларусийн ерөнхийлөгчийн сонгууль болно. Энэ сонгуулиар Лукашенко долоо дахь удаагаа сонгогдох нь бараг баараггүй тул эрх баригчид эртнээс эсэргүүцэгчдийг дарахдаа бэлдэж эхэлжээ. Тухайлбал, тус улсын Дотоод хэргийн яам өнгөрсөн Мягмар гаригаас бослогын эсрэг сургуулилалт эхлүүлэв. Энэ нь Беларусийн засгийн газар аливаа эсэргүүцлийг тэвчихгүй гэсэн дохио болж байна. Лукашенког 2020 онд сонгогдсоны дараа өргөн хүрээг хамарсан эсэргүүцлийн жагсаал өрнөхөд 65 мянга орчим хүнийг баривчилж байжээ.

Өдгөө тус улсын сөрөг хүчний томоохон зүтгэлтнүүд нэг бол шоронд хоригдсон, эс бол эх орноосоо дүрвэсэн байдалтай байна. Хүний эрхийн төлөө тэмцэгчдийн мэдээлж буйгаар Беларусь улсад 1300 орчим улс төрийн хоригдол хоригдож байна. Тэдний олонх нь эмнэлгийн тусламж үйлчилгээ авах, гэр бүлийнхэнтэйгээ холбогдох боломжгүй байна.

Гэхдээ Лукашенкогийн ажлын алба энэ долоо хоногт улс төрийн 32 хоригдлыг суллажээ. Энэ нь Лукашенко АНУ болон Европын Холбоотой яриа хэлэлцээ хийхэд нээлттэй байгааг илэрхийлнэ гэж үзэв.