Ханан дээр наасан гадил 2019 онд 120 мянган ам.долларын үнэ хүрч дэлхий нийтийг гайхашруулаад байв. Тэгвэл зураач Маурицио Каттеланы "Инээдмийн жүжигчин" гэх уг бүтээл Лхагва гаригт Нью-Йоркийн "Sotheby’s" дуудлага худалдаагаар 6.4 сая ам.доллар хүрч, дахин олон нийтийг нүдийг орой дээр нь гаргасан байна. Дуудлага худалдааны төв уг гадилыг хамгийн ихдээ 1.5 сая ам.доллар хүрнэ гэж таамаглаж байжээ.

Эхлэх үнэ нь 800 мянган ам.доллар байсан аж.

Зарагдах бүтээлүүдийг танилцуулж байсан Оливер Баркер "Зүгээр л хананд скочоор наасан гадил боловч би үүнийг үзэсгэлэнтэй, үймээн самуун дэгдээж чаддаг гээд магтаж өгсөн. Би хэзээ ч хэлнэ гэж бодож байгаагүй үгсээ хэллээ" гэж хошигножээ. Дуудлага худалдаа дууссаны дараа "Sotheby’s" уг бүтээлийг Хятадын цуглуулагч, крипто валютын платформыг үндэслэгч Жастин Сун худалдаж авсан болохыг илчилжээ.

Тэрбээр хэлэхдээ "Энэ бол зүгээр нэг урлагийн бүтээл биш. Энэ гадил нь урлаг, хошигнол, крипто валютын хоршилыг илэрхийлдэг. Энэ бүтээл ирээдүйд илүү их хэлэлцүүлэг үүсгэж, түүхийн нэг хэсэг болно гэдэгт итгэлтэй байна" гэлээ.

Дуудлага худалдааны ялагч нэг ширхэг хар скоч, нэг банана хүлээн авна. Үүний зэрэгцээ жинхэнэ эх хувь мөн болохыг баталсан гэрчилгээ, хэрхэн ханан дээр суурилуулах албан ёсны зааварчилгааг авна. Дашрамд дурдахад, уг гадил нь анхны хувилбар биш юм. Анхны хувилбарыг нь 2019 онд уран бүтээлч Дэвид Датуна ханан дээрээс хуулж аваад идчихсэн ажээ.