Нийслэлийн Иргэдийн төлөөлөгчдийн хурлын хуралдаанаас шийдвэр гарч арваннэгдүгээр сарын 8-наас эхлэн импортын автомашинд хотын дугаар олгохдоо хэд хэдэн шалгуур үзүүлэлтийг тавьж буй. Эдгээрийг өндөр шалгуур үзүүлэлт гэж иргэд бухимдах болсон. Уг тогтоол хэрэгжиж эхэлснээс хойш гааль дээр 37 мянган машин хүлээгдэж байгаа гэсэн мэдээлэл ч бий. Энэ мэт маш олон асуудал, хэл ам дагуулсан шийдвэр хэрэгжиж эхлээд 10 гаруй хонож байна. Үүний цаана хэн нэгний бизнес цэцэглэж, ногоон гэрлээр алхах боломж нээгдэж байхыг үгүйсгэхгүй. Учир нь хэдхэн хоногийн өмнө шилэн Цогоо буюу Зам тээврийн яамны дэд сайд асан Б.Цогтгэрэлийн дүү Гаалийн ахлах байцаагч дүүгийнх нь нөхөр автомашины азын дугаар дамлаж зардаг гэх мэдээлэл олон нийтийн сүлжээгээр явав.

Өөрөөр хэлбэл, тус эмэгтэй хөрөнгө орлогын мэдүүлэгтээ 24 машинтай гэж мэдээлсэн байна. Эдгээр машинаа унах бус азын дугаар авч, түүнийг нь үнэд хүргэж зардаг гэсэн яриа гараад байгаа билээ.

Энэ мэтчилэн төрийн шийдвэрээр нэг хэсэг нь хөлжиж, хожиж байхад нөгөө хэсэг нь үнийн хөөрөгдлийг дийлэхгүй, 500 мянгаас дээш үнийн дүнгээр машины дугаар авах нөхцөл үүсээд байгаа нь олны шүүмжлэлийг дагуулаад буй. Төрийн оролцоотой бүхэн иргэдэд ямар нэг байдлаар хүндрэл, дарамт л учруулахаас өөрцгүй байна гэж олон нийт ч хэлж, ярьж, шүүмжилж байна. Угтаа бол автомашины дугаар хэвийн олгогдож, иргэд ч өндөр үнэ төлөхгүйгээр автомашиныхаа дугаарыг авчихдаг байлаа. Ингэхдээ ямар нэг чирэгдэлгүй, одоогийн үнээс 10 дахин бага үнээр авчихдаг байв. Гэтэл автомашины дугаар олгоход одоо хамгийн багадаа 500 мянган төгрөг төлж буй. Хуучин автомашиныг зах зээлээс шахах, нийтийн эрх ашгийн төлөө шийдвэр гаргаж байгаа нь үнэн боловч нөгөө талдаа автомашины дугаарыг 10-20 дахин нэмэгдүүлэх хэмжээнд хүргэсэн нь төр өөрөө юм.

Төрийн шийдвэр гарч, хэрэгжиж эхэлснээс хойш Улаанбаатарын серитэй дугаарын эрэлт ихэсч, үнэ нь өсөөд байгаа бөгөөд хотын дугаар цифрээсээ хамаарч 500 мянгаас эхлэн хоёр сая хүртэл буюу 10-20 дахин нэмэгдсэн нь бодит үнэн. Мөн уг тогтоол хэрэгжиж эхэлсний дараа Авто тээврийн үндэсний төв автомашины дугаарыг 90 хүртэлх хоног хадгалах үйлчилгээг нэвтрүүлсэн. Тодруулбал, тухайн иргэн өөрийн хэрэглэж байсан тээврийн хэрэгслийн дугаарыг дараагийн авах машиндаа зүүж болно гэсэн үг. Ингэхдээ өөрийн эзэмшлийн тээврийн хэрэгслийг зарж борлуулсан, дараагийн тээврийн хэрэгслээ хараахан авах болоогүй бол өдрийн 5500 төгрөгөөр тооцож машиныхаа улсын дугаарыг гурван сар хадгалуулж болох юм. Дугаараа хадгалуулах иргэд цөөхөн, нийгмийн эрэлт, хэрэгэцээндээ тулгуурлаад автомашины дугаар худалдаж авахаас өөр аргагүй байгаа нь хуулийн цоорхойг ашиглаж, далд хэлбэрээр бизнес эрхлэгчид буюу ченжүүдийн ашиг сонирхолд нийцсэн шийдвэр болоод буйг анхааралдаа авах нь зүйтэй болов уу.

Төрийн шийдвэр хэсэг бүлэг ашиг хайгчдын халаасыг зузаатгаж, арга ядсан иргэдэд дарамт л үүсгэж байгаа юм.

Гаргасан шийдвэрээ тайлбарлахдаа хотын түгжрэлийг бууруулна гэж буй. Атал түгжрэлийг бууруулна гээд олон жил ярьж, хэчнээн тэрбумаар тоологдох төсөв мөнгө зарчихаад үр дүнгээ өгсөн нь үгүй. Энэ мэт аливаа зүйлд төр оролцоод ирэхээр үр дүнтэй зөв алхам гэхээсээ илүүтэй ашиг сонирхлын зөрчил үүсч эхэлдэг нь ч бодит амьдрал дээр харагдаж эхэллээ. Хотын дугаар олгохоо больсноор иргэд машин авахаа больж, түгжрэл буурахгүй байгааг ч автомашины худалдаа эрхлэгчид онцолж байна.