Газын зурвас, Ливан дахь цэргийн ажиллагаатай холбоотойгоор цэрэг татлагын насны үнэн алдартны шашинт эрчүүдийг Израилийн армид элсүүлэх болсон. Үнэн алдартны еврейчүүдийг цэргийн албанаас чөлөөлөх боломжгүй гэсэн шийдвэрийг Дээд шүүх зургадугаар сард гаргажээ. Энэ шийдвэрийн дараа Израилийн эрх баригчид хэт үнэн алдартны еврейчүүдэд 3000 тушаалын төсөл илгээсэн.

Батлан хамгаалахын шинэ сайд Израиль Кац өнгөрсөн долоо хоногт нэмэлт 7000 тушаалын төсөл илгээхээ мэдэгджээ. Нэмэлт тушаалын төслийг өмнөх сайд Йоав Галлант албан тушаалаа хүлээлгэж өгөхөөсөө өмнө баталчихсан байжээ. Гэтэл тус улсын армийн генерал Шей Тайиб Мягмар гаригт мэдэгдэл хийхдээ 10 мянган алба хаагч хүрэлцэхгүй байж магадгүй гэлээ.

“Израилийн армид цэрэг хэрэгтэй байна. Бид 10 мянга гэсэн тоон дээр тогтоод байгаа ч энэ нь тогтвортой биш” гэж Шей Тайиб хэлжээ.

Түүнчлэн тушаалын төсөлд хариу өгөөгүй хэт үнэн алдартны 1126 алба хаагчийг баривчлах тушаалыг Израилийн арми гаргасан байна. Тэднийг цэргийн албанаас зугтагч гэж зарлаад гадаадад зорчихыг нь хориглож магадгүй.

Баривчлах тушаалаас ч өмнө хэт үнэн алдартны шашинтнуудын нийгэмлэг дунд уур хилэн үүсээд байсан. Тодруулбал, өнгөрсөн Ням гаригт Тель-Авиваас зүүн зүгт орших Бней Брак хотод цагдаа нар болон хэт үнэн алдартны шашныхны хооронд мөргөлдөөн гарчээ. Жагсагчид “Шашингүй еврей болж амьдарснаас шашинтайгаа үхсэн нь дээр”, “Цэрэгт татагдсаны оронд үхсэн нь дээр” зэрэг уриа лоозонг барьсан байв. “Бид үхэх болно. Бид шоронд удаан хугацаагаар байна. Гэхдээ Израилийн армид очихгүй. Хэрвээ очвол шашингүй болно гэсэн үг” гэж жагсагчид хэлжээ.