IESF буюу Олон улсын цахим спортын холбооны дэлхийн аварга шалгаруулах тэмцээн энэ жил CS2, Dota2, Mobile Legends, PUBG Mobile гэсэн дөрвөн төрлөөр аваргуудаа тодруулж байна. Монгол Улсаа төлөөлөн эдгээр төрлүүдэд баг тамирчид Саудын Арабын Рияд хотыг зорьсон юм.

Өчигдөр/2024.11.19/ дэлхийн аваргын dota2-ийн төрөл өндөрлөж, медальтнууд тодорлоо. Монголын dota2-ийн баг дэлхийн аваргын хүрэл медалийн төлөө Туркийн эсрэг тоглож, 1-2 гэсэн харьцаатай хожигджээ. Эхний тоглолт дээр Туркийн баг илүүрхсэн ч хоёр дахь тоглолтод Монголын баг хожсоноор шийдвэрлэх гурав дахь ээлжийн тоглолт гарсан. Улмаар Туркийн баг хожиж, хүрэл медаль, 20 мянган ам.долларын эзэд болов. Харин Монголын баг дөрөвдүгээр байрт орсон амжилтаараа 10 мянган ам.доллар хүртжээ.

Өнгөрсөн жилийн дэлхийн аваргын dota2-ийн төрөлд монголчууд түрүүлж байсан билээ.

Монгол-Туркийн тоглолт нийт 3 цаг 25 минут 50 секунд үргэлжилсэн нь dota2-ийн түүхэнд гуравдугаарт орох удаан үргэлжилсэн тоглолт болжээ. Монголын dota2-ийн баг тэмцээнийг тун сайн эхлүүлж, хэсэгтээ нэг ч хожигдоогүй. Гэвч хасагдах шатны эхний тоглолтдоо Беларусийг хүртэл хожсон ч хагас шигшээ болон медалийн тоглолтуудад дараалан хожигдлоо.

Монгол, Туркийн багууд хэсэгтээ учраа таарахад Монгол 2-0 гэсэн харьцаатай хожсон аж.

Энэ төрөлд Монголыг хагас шигшээд хожсон Грекийн баг түрүүлж, Шведийн баг дэд аварга болжээ.

Бусад төрөлд оролцсон баг тамирчид, дараах амжилтыг үзүүлэв. PUBG Mobile-ийн төрөлд оролцсон Монголын баг 16 багаас аравдугаар байраар тэмцээнээ өндөрлүүлжээ. Харин Mobile Legends-ийн эрэгтэй ангилалд өрсөлдсөн Монголын баг 5-8 дугаар байр эзэлж, таван мянган ам.долларын эзэд болсон аж. Тэгвэл тус төрлийн эмэгтэй ангилалд өрсөлдсөн Монголын бүсгүйчүүд 9-10 дугаар байрт орж, тэмцээнээ хэсгийн шатнаас өндөрлүүлсэн гэнэ. Тэд лан тэмцээнд оролцсон Монголын анхны эмэгтэй Mobile Legends-ийн баг болжээ. Найдлага тавьж байсан төрлүүдийн нэг болох CS2-ийн төрөлд оролцсон Монголын баг 5-8 дугаар байраар тэмцээнээ дуусгаж, 12.5 мянган ам.долларын эзэд болов.