Генерал Ч.Амарболд 2008 оны долдугаар сарын 1-ний үймээнд буруутгагдаж, ял эдэлсэн байна. Төрийн ордонд болж буй сонсголын үеэр түүнээс зарим зүйлийг тодрууллаа.

Тэрбээр "Юуны өмнө манай төрийн эрх барих хууль тогтоох дээд байгууллага УИХ-аас нэр бүхий УИХ-ын гишүүдийн хүсэлтээр Монголд хүний эрхийн асуудал хэрхэн хангагдаж байгаа асуудлаар зориуд нээлттэй сонсгол хийж байгаа нь маш ач холбогдолтой арга хэмжээ юм. Ер нь Монгол Улс НҮБ-ын Хүний эрхийн түгээмэл тунхаглал, Эрүүдэн шүүхийн конвенци гээд бүх бичиг баримтад нэгдсэн байдаг. Манайх хууль ёсыг дээдэлсэн, ардчилсан төр засагтай улс учраас эрүүдэн шүүх асуудал гарахгүй байх гэж боддог. Гэтэл амьдрал дээр ийм асуудал гарсаар байдаг. Эрүүдэн шүүлтийг хүмүүс өнгөц ойлгож ирсэн. Хүнийг барьж аваад зодож, хоолгүй, нойргүй байцаахыг хэлдэг гэж ойлгодог.

Гэтэл хүний эрхийн бичиг баримтад эрүүдэн шүүлт нь хүнд хүч хэрэглэхээс гадна хүнийг удаан хугацаагаар хорих, хилс хэрэгт гүтгэх, гөрдөх, хилсээр шийтгэх, ажил, амьдралыг нь доройтуулах зэрэг нь бүгдээрээ юм.

Миний хувьд сонсгол дээр танилцуулсан илтгэлүүдийг анхааралтай харж сууна. Ер нь ямар асуудалд анхаарч байгааг мэдэх хэрэгтэй байна. Цагдаагийн ажилтан байсныхаа хувьд 2008 оны долдугаар сарын 1-ний үймээнээр буруутгагдаж байсан. Бид олуулаа байсан. Цагдаагийн байгууллагын Эргүүл хамгаалалтын газрын 14 албан хаагч, удирдах дөрвөн дарга энэ асуудалд холбогдож, шалгагдсан. Энэ үймээн дээд цэгтээ хүрч, дийлдэхээ байсан үед Онцгой байдлын тухай хуулийн дагуу Ерөнхийлөгч онц байдал зарлах тухай зарлиг гаргаж, манай байгууллаг албадан тараасан. Хууль нь ерөөсөө тэр. Хэрвээ ингэж тараагаагүй байсан бол Монголын нийгэмд ямар хохирол учрах байсныг таахад хэцүү. Лав л Улаанбаатарыг  тэр чигээр нь шатаахад бэлэн байсан. Иргэд архи хэрэглэсэн, улайрчихсан "Монголбанкийг дээрэмдье", "Баячуудын гэрийг шатааж, тоноё" гэсэн. Үймээнийг тараахын өмнө Үндэсний аюулгүй байдлын зөвлөлийн хурал дээр миний бие асуулт тавьж, хариулт авсан. Тэр үед "Цагдаагийн байгууллага хуульд заасан хүч ба арга хэрэгслээр гэдэг нь юу гэж байгаа вэ. Бид өмнө нь ингэж ажиллаж байгаагүй. Арга хэрэгсэл гэдэгт цагдаагийн зэвсэглэлд байдаг гав бороохой, резинен сумтай буу, нулимс асгаруулагч орохоос гадна байлдааны галт зэвсэг ордог. Алийг нь хэрэглэх вэ. Олон хүн бужигнаж байгаа газар байлдааны галт зэвсэг хэрэглэж болохгүй байх. Хүсээгүй муу үр дагавар гарч болзошгүй" гэж  хэлсэн. Тэр дор нь үймээнийг тараах үүргийг албан хаагчдадаа өгсөн. Тэгээд шөнийн 01.00 цаг гэхэд үймээнийг тараасан. Үнэхээр олон нийтийг хамарсан эмх замбараагүй байдал үүсч 800 гаруй хүн баривчилсан. Гэтэл шөнийн 03.00 цагт цагдаагийн байгууллагад "Улсын нэгдүгээр эмнэлэгт хүн нас барсан байна" гэдэг дуудлага ирсэн. Тэнд үзлэг хийхээр буудуулж нас барсан хүн байдаг. Дарааллаад гурван хүн нас барсан байсан. Үүнийг хэн буудсан гэдэг эзнийг тогтоохын тулд прокурортой нийлж, 51 ажлын хэсгийг байгуулсан ч маргааш нь буулгасан. Цагдаа буутай явсан үнэн ч хошуутай сумгүй, дуу гардаг хонгиотой явсан. Хүн хөнөөх зэвсэггүй явсан байдаг. Энэ бол миний өгсөн үүрэг. Тэгээд биднийг мөрдөөд, Өршөөлийн хуульд хамруулж болохгүй гэж чиглэл өгч, сүүлд цэргийн гэмт хэрэгтэн болгож, ялласан" гэв.

Гэрэл зургийг Л.Энх-Оргил