"Blackpink" хамтлагийн дуучин Ружэгийн бие даасан цомог "rosie" ирэх сарын 6-нд гарах бөгөөд 12 дуутай. Уг цомогт багтсан "APT" дууг Бруно Марстай хамтран дуулсан нь төсөөлөмгүй их амжилт дагуулаад байгаа билээ. Тэгвэл цомгийн дараагийн уран бүтээл "Number one girl" энэ Баасан гаригт цацагдах гэж байна.

"APT" дуу зөвхөн Өмнөд Солонгос төдийгүй дэлхийн хөгжмийн чартуудыг тэргүүлсэн. Тодруулбал, нийт 40 бүс нутагт "iTunes"-ын шилдэг дуунуудын жагсаалтыг тэргүүлж, "Billboard"-ын "Hot 100" жагсаалтад гурван долоо хоногийн турш дээгүүр байрууд эзэлжээ. Улмаар өмнө нь "Blackpink" хамтлагийн тогтоосон байсан "Billboard"-ын амжилтыг эвдэж, К-поп эмэгтэй дуучны хамгийн өндөр хандалттай уран бүтээл болжээ.

Ружэ 2021 онд "R" нэртэй цомгоо гаргаснаар хамтлагаасаа бие даасан цомог гаргасан хоёр дахь гишүүн болсон. Тухайн үед "On The Ground" дуу "Billboard"-ын "Hot 100" жагсаалтад 70 дугаарт бичигдэж, мөн л К-поп эмэгтэй уран бүтээлчдийн амжилтыг эвдэж байв.