Швейцарьт төвтэй "Education First" олон улсын боловсролын компани 2011 оноос хойш жил бүр англи хэлний түвшин тогтоох индексийг гаргаж байна. Энэ нь дэлхийн хэмжээнд хамгийн томд тооцогддог индекс бөгөөд англи хэлийг эх хэл гэж тооцдоггүй 116 улс орон, бүс нутгийн 2.1 сая хүний дүнг нэгтгэж гаргадаг.

"Education First" компани энэ жилийн индексийг саяхан танилцууллаа. Нийт 800 оноо авах ёстой бөгөөд энэ жил шалгуулагчдын дундаж оноо 477 гарчээ.

Мөн улс орнууд болон бүс нутгуудыг англи хэлний чадвараар нь таван бүлэгт хуваасан байна. Үүнд, маш өндөр, өндөр, дунд зэрэг, бага, маш бага гэсэн ур чадварын түвшин багтана.

Энэ жилийн чансаагаар Нидерланд улс нэгдүгээр байранд оржээ. Харин Азийн шилдэг англи хэлтэй улсаар Сингапур шалгарсан бол түүний араас Филиппин, Малайз удаалав. Өмнөд Солонгос улс дунд зэргийн чадвартай гэж үнэлүүлсэн бол хятадууд бага ур чадвартайд тооцогдов. Азийн орнуудаас Мьянмар, Тайланд, Камбож улсууд маш бага ур чадвартайд оржээ. Гэхдээ шалгалт өгөх шаардлагыг хангаагүй Лаос, Хойд Солонгос зэрэг улс мөн байгаа. Япон улс энэ жилийн чансаагаар 454 оноо авч, дунджаас доогуур үнэлүүлэв.

Монгол Улсын тухайд 464 оноо авч, 116 орноос 84 дүгээрт эрэмбэлэгдэв. Ангиллын тухайд бага ур чадвартайд тооцогджээ.