Нийслэлийн Засаг дарга Х.Нямбаатарын захирамжаар энэ сараас /2024.11.08/ импортоор орж ирсэн автомашинд Улаанбаатар хотын серитэй дугаар шинээр олгохгүй байх шийдвэр хэрэгжиж эхэлсэн. Энэ шийдвэр иргэд болон бизнес эрхлэгчдийг маш ихээр бухимдуулж байгаа юм. Тиймээс энэ удаа найман шалгуурын нэг болох сүүлийн 10 жилийн дотор үйлдвэрлэгдсэн тээврийн хэрэгсэл байх гэдэг дээр автомашин импортлогчдын байр суурийг сонссон юм.

"ИРГЭДИЙГ ЭДЭЛЖ ҮЗЭЭГҮЙ ҮНЭТЭЙ БРЭНДИЙН МАШИН УНАХЫГ ТУЛГАЖ БАЙНА"

Авто худалдаа, машины бизнес эрхлэгчдийн холбооны тэргүүн П.ГАНЦООЖ:

-Автомашин импортлогчдын холбоонд нийслэлээс албан ёсоор улсын дугаарын хязгаарлалтын найман шалгуураас хоёрыг нь хассан гэдэг мэдээлэл ирээгүй. Хууль зүй, дотоод хэргийн яамнаас энэ шийдвэрийг буцааж, нийтийн хэлэлцүүлэг зохион байгуулах хүсэлт тавьсан гэж ойлгож байгаа. Нийслэлд тээврийн хэрэгслийн улсын бүртгэлийн дугаар олгох найман шалгуур дотор автомашины хөдөлгүүр "евро-4” эсвэл түүнтэй дүйцэхүйц буюу түүнээс дээш байна гэж заасан. Одоо Монголд явж байгаа машинууд энэ шалгуурт бүгд нийцэж байгаа байх. Учир нь автомашины үзлэг оношилгоонд орж байгаа машины хөдөлгүүрүүд энэ шаардлагад нийцэж байна гэсэн үг.

Мөн сүүлийн 10 жилийн дотор үйлдвэрлэгдсэн тээврийн хэрэгсэл байх гэдэг шалгуурт доод тал нь 2014 оны "Приус-41" гэдэг машин л тэнцэж байна.

Нэг ёсондоо "Приус-41" маркийн машин уна эсвэл эдэлж үзээгүй үнэтэй брэндийн машин уна гэдэг сонголтыг тулгаж байна. Жишээлбэл, 19 настай гурван жил мөнгөө цуглуулж машин авч болдог байсан бол одоо 13 жил ажиллаж байж машинтай болох боломжтой болж байна. Энэ бол хүний эрх зөрчсөн шийдвэр. Амьдрал дээр хэрэгжих гэхээр олон асуудал тулгарч, шүүмжлэл дагуулж байна.

"ЗАМЫН ХУРААМЖИЙГ 10 ЖИЛЭЭС ДЭЭШ НАСЖИЛТТАЙ МАШИНД НЭМЭХ ХЭРЭГТЭЙ"

Эко автомашины импортлогчдын холбооны тэргүүн Ц.ЛХАГВАЖАВ:

-Нийслэл хотын замын хураамж гээд жилд 20-30 мянган төгрөг авдаг. Тэр хураамжийг 10 жилээс дээш насжилттай машинд өндөр болгож, нэмэх байдлаар хэрэглэгчдэд сонголтыг нь өгөх хэрэгтэй. Хэрвээ тэгвэл би 10 жилээс дээш насжилттай автомашин худалдаж аваад, жил бүр өндөр хураамж төлөхийг хүсэхгүй. Эсвэл нэг, хоёр жилийн дараа хүлээж байгаад он залуу машин худалдаж авахыг бодно. Ийм сонголтыг иргэдэд өгвөл машины эрэлт нийлүүлэлт нь хязгаарлагдана. Энэ зохицуулалт нь иргэд болон бизнес эрхлэгчдэдээ ээлтэй шийдвэр болж чадна.

"ХЯТАД МАШИН ЗАХ ЗЭЭЛД ШАХАХ ГЭЖ БАЙНА"

БНСУ-аас автомашин нийлүүлэгчдийн холбооны тэргүүн А.АЛТАНГЭРЭЛ:

-Бид ардчилсан нийгэмд амьдарч байгаа. Гадаад улсаас автомашин оруулж ирээд иргэдийн боломжид тааруулан, зах зээлийн үнээр худалдан борлуулж байхад төрөөс хязгаарлалт хийх нь буруу. Дээрээс нь маш том ашиг сонирхол энд явж байна. Хятад улсад үйлдвэрлэсэн автомашиныг шинэ гэдэг нэрийн дор шахах гэж байна. Эвдрэл гэмтэл ихтэй, сэлбэг таардаггүй, ховор автомашинуудыг оруулж ирэхийн тулд ийм шийдвэр гаргаж байна. Монголчууд Япон, Өмнөд Солонгос улсын автомашины чанарыг мэддэг, амьдрал ахуйдаа ашигладаг болсон. Хятад машины төмрийн орц найрлага нь хөнгөн, зөөлөн байдаг. Тиймээс Монголын нөхцөлд таарч, тохирохгүй. Үүнийг мэдсээр байж төрийн байгууллагуудад хятад автомашин нийлүүлж байгаа нь эрх ашигтай л гэж харж байна.

Ард иргэд цоо шинэ автомашин худалдаж аваад, 10 жил тасралтгүй унах боломжгүй. Хамгийн дээд тал нь 5-6 жил л унаад, машинаа сайжруулахыг л боддог.

Хотын улсын дугаар авах найман шалгуурт сүүлийн 10 жилд үйлдвэрлэсэн машин буюу 2016 оноос хойш гээд хугацаа заахаар үнэ нь нэмэгдэнэ. Энгийн ард иргэд худалдан авч дийлэхгүй. Хятад автомашиныг шинэ гэдгээр нь оруулж ирж, Монголын автомашины зах зээлийг эзлэх гэж байна.

"ДУНДАЖ ДАВХАРГААС ДЭЭШ ХҮМҮҮС МАШИН УНАХ СОНГОЛТЫГ ТУЛГАЖ БАЙНА"

Эко автомашины импортлогчдын холбооны УЗ-ийн гишүүн Н.ШАГДАР:

-Сүүлийн 10 жилийн дотор үйлдвэрлэгдсэн тээврийн хэрэгсэл байх гэдэг шалгуур нь хятад машины сонголт руу оруулж байна. Ард иргэд 0 километртэй шинэ машин байнга худалдан авч чадахгүй. Үнийн хувьд хамгийн багадаа 100 саяас эхэлнэ. Шинэ машины урьдчилгаагаа цуглуулах гэж олон жил болно шүү дээ. Гэтэл иргэд өнөөдөр 20 сая төгрөгийн машин худалдан авах гэж 2-3 жилийн лизинг төлж байна. Дундаж давхаргаас дээш хүмүүс машин унаж, доошоогоо явган алх гэдэг сонголт руу очиж байна.

Найман шалгуурыг жирийн ард иргэд хэзээ ч биелүүлж чадахгүй. Машинтай байхын тулд грааж, зогсоолтой байх ёстой гэнэ. Гэтэл гэр хороололд хашаандаа машины хучаад, байршуулдаг иргэд олон байгаа. Тэдэнд грааж, зогсоолын үл хөдлөхийн гэрчилгээ гэж байхгүй. Шинэ өндөр үнэтэй машин худалдан авах хүсэлтэй хүмүүсийн дараа бичигдсэн ч өмнөх дараалал нь дуусахгүй, хүлээгдээд л байна. Жишээлбэл, хөдөө орон нутгийн иргэдийн автомашин үнэгүйдэх эрсдэл үүсгэж байна. Орон нутгийн иргэд машины орон нутагтаа л зарах боломжтой. Тэгсэн мөртлөө хотын дугаартай машины үнэ нь эсрэгээрээ нэмэгдэж байгаа нь шударга бус ялгаварлан гадуурхалт үүсгэж байна.