Монгол Улсын Засгийн газрын Тэргүүн шадар сайд Н.Алтанхуяг энэ есдүгээр сарын 1-4-ний өдрүүдэд БНХАУ-д албан ёсны айлчлал хийлээ. Тэрбээр Хятадын Жилин мужийн Чанчунь хотод болсон Зүүн хойд Азийн худалдаа эдийн засгийн хамтын ажиллагааны дээд хэмжээний чуулга уулзалт, үзэсгэлэн яармагт  Монголын талаас оролцогчдыг ахалж явсан юм.   Дээд хэмжээний уулзалтад УИХ-ын гишүүн, Эдийн засгийн байнгын хорооны дарга Ц.Баярсайхан, Зам тээвэр барилга хот байгуулалтын дэд сайд Т.Пүрэвдорж, Эрдэс баялаг эрчим хүчний дэд сайд Х.Ариунсан, Төрийн өмчийн хорооны дэд дарга Б.Эрдэнэбулган нарын арав гаруй төлөөлөгч оролцсон байна.

Айлчлалын эхний өдөр Монгол Улсын Тэргүүн шадар сайдыг Жилин мужийн намын хорооны нарийн бичгийн дарга Сун Жэнцай, БНХАУ-ын улстөрөөр зөвлөлдөх зөвлөлийн дэд дарга Ван Ган, Хятадын коммунист намын гадаад харилцааны газрын дарга нар тус тусын шугамаар хүлээн авч уулзсан байна. Тэд Тэргүүн шадар сайдыг энэ арга хэмжээнд ач холбогдол өгч хүрэлцэн ирсэнд талархал илэрхийлээд зургаа дахь жилдээ зохиогдож буй Зүүн хойд Азийн чуулга уулзалтад Монгол Улсын Засгийн газар ихээхэн ач холбогдол өгч оролцож байгаа нь цаашид хоёр улсын харилцаа улам өргөжин тэлэхэд дэмжлэг болох нь гарцаагүй гэдгийг онцлон тэмдэглэжээ. Эрт үеэс улбаатай хоёр орны худалдаа, эдийн засаг, соёл урлаг, боловсрол зэрэг бүхий л салбарт хамтын ажиллагаа жилээс жилд өргөжин тэлж байгааг тэд мөн онцолсон байна.

Д.ОЮУН