Бразилын тэргүүн хатагтай Жанжа Лула да Силва "G-20"-ийн дээд хэмжээний уулзалтын үеэр Элон Маскийг дурдаж, буруу ташаа мэдээллийг таслан зогсоохын тулд цахим орчинд зохицуулалт шаардлагатай байгааг онцолжээ. Түүнийг Бямба гаригт болсон арга хэмжээнд үг хэлж байхад нь хөлөг онгоцны дуут дохио дугарсан аж.

Үүний дараа тэргүүн хатагтай Жанжа Лула да Силва "Би энийг Элон Маск гэж бодож байна. Би чамаас айхгүй байна. Чамайг хараал идэг Элон Маск" гэжээ.

Тэргүүн хатагтайн Элон Маскд "Fuck you" гэж хэлж буй бичлэг "Х" платформ дээр тавигдаж, дэлхийн хамгийн баян хүн хариулт өгчээ. Элон Маск тухайн бичлэгийг өөрийн цахим хуудас дээрээ нийтэлж, инээж буй дүрстэй эможи графикаар шоолж буйгаа илэрхийлсэн байна.

Мөн өөр нэгэн нийтлэлдээ Бразилын ерөнхийлөгч Луиз Инасио Лула да Силваг дараагийн сонгуульд ялагдах болно гэсэн байна.

Бразилд нэг сарын хугацаатай "Х" платформ хориглогдоод байсан. Тухайн үед тус улсын дээд шүүх "Х" платформ нь хуурамч мэдээ тараадаг гэж үзэн, нэхэмжлэл үүсгээд байсан юм. Элон Маск дээд шүүхтэй удаан хугацаанд маргалдаж, өнгөрсөн сараас эхлэн үйл ажиллагаагаа Бразилд явуулах боломжтой болсон байдаг. Гэсэн хэдий ч тус улсын эрх баригчид Элон Маскыг шүүмжилсэн хэвээр байгаа бөгөөд "усыг нь уувал ёсыг нь дага" гэгчээр түүнийг Бразилын хуулийг мөрдөх ёстой гэж үзэж буй.