ОХУ-ын арми Хойд Солонгосын 100 мянган цэргийг байршуулахаар хэмжээний мөнгө зарлагадахаар төлөвлөж байна. Гэвч цэргүүд үүнийг хүлээж авах магадлал бага гэдгийг Хойд Солонгосын асуудлыг судалдаг шинжээчид хэлжээ. Цэргүүдийн оронд Ким Жон Ун тэргүүтэй Хойд Солонгосын удирдагчид тэр мөнгийг нь халааслана гэж үзэж байна.

Одоогоор Хойд Солонгос улс 11 мянга орчим цэргээ Украин руу илгээсэн гэж эх сурвалжууд мэдээлж буй. Энэ тоо цаашид ч өсөх магадлалтай. Өмнөд Солонгос дахь Украины Элчин сайд Дмитро Пономаренкогийн хэлснээр амралтын өдрөөр энэ тоо 15 мянга хүрэх магадлалтай байна. Цэргүүдийг 2-3 сар тутамд сэлгэн солих аж. Нэг жилийн хугацаанд 100 мянган хойд солонгос цэрэг Оросын армид тулалдана гэдэг тооцооллыг эндээс гаргажээ.

Мөн хойд солонгос цэргүүд сарын 2000 ам.доллараар цалинжиж байгааг Өмнөдийн тагнуулын эх сурвалж мэдээллээ. Энэ нь хойд солонгос хүний хувьд амьдралыг өөрчлөхүйц мөнгөн дүн юм. Дүрвэгсдийн мэдээлж буйгаар тус улсад ажилчид болон цэргүүдийн дундаж цалин сарын нэг ам.доллараас хэтэрдэггүй. Гэлээ ч цэргүүд энэ мөнгийг бодитоор гар дээрээ авахгүй гэж таамаглаж байна.

Батлан хамгаалахын шинжээч, Хойд Солонгос судлаач мэргэжилтэн Брюс В.Беннэт хэлэхдээ "Оросоос орж ирэх энэ мөнгө эрх баригч нам болон Ким Жон Уны гэр бүл рүү шууд шилжинэ гэж сэжиглэж байна" гэлээ. Хойд Солонгосын дотоод зохион байгуулалт болон түүхэнд үндэслэн энэ таамаглалыг дэвшүүлж байна. Хойд Солонгосын төр засаг хилийн чанадад ажиллаж буй иргэдийнхээ цалинг хурааж авдаг гэх баримт нотолгоо цөөнгүй байдаг. Тэгэхээр цалингаас нь тодорхой багахан хувийг цэргүүдэд өгч магадгүй. Аль эсвэл бүр юу ч өгөхгүй байх магадлалтай.

Цэргүүдэд ч, ар гэрийнхэнд нь ч мөнгө олгохгүй байх магадлал өндөр гэдгийг 2000-аад оны эхээр тус улсаас дүрвэсэн цэрэг Хьюнсен Ли хэлжээ.

Цэргүүд авахгүй байлаа ч эцсийн дүндээ энэ мөнгө Хойд Солонгосын эдийн засагт асар их тус нэмэр болно. Тус улсын дотоодын нийт бүтээгдэхүүн дөнгөж 40 тэрбум ам.доллараар хэмжигдэж байна.

Гэтэл эсрэгээрээ удирдагч Ким Жон Ун тансаг хэрэглээгээрээ алдартай. Хойд Солонгос улс 2024 оны эхний найман сарын хугацаанд л гэхэд 52 сая ам.доллараар үнэлэгдэх тансаг бараа бүтээгдэхүүн импортолжээ. Үүнд гоо сайхны бараа, бугуйн цаг, архи зэрэг багтана. Эдгээр бараа бүтээгдэхүүнийг Ким улсынхаа элитүүдэд үнэнч байдлыг нь шагнан бэлэглэдэг аж. Кимийн гэр бүлийнхэн болон ойрын зөвлөхүүд нь өндөр үнэтэй цаг, хувцас, цүнх сэлтийг олны өмнө ил тод эдэлж хэрэглэдэг гэдэг.

Оросоос орж ирсэн мөнгөний зарим нь цэргийн техник хэрэгсэлд, зарим нь хоол хүнс гэх мэт хэрэглээний бараа бүтээгдэхүүнд зарцуулагдана. Зарим төлбөрийг анхнаас нь хоол хүнс хэлбэрээр ч хийж магадгүй аж.