Эко авто машин импортлогчдын холбоо, Авто худалдаа, машины бизнес эрхлэгчдийн холбооноос нийслэлд улсын дугаар олгохыг хязгаарлаж буйг эсэргүүцэж өнөөдөр /2024.11.19/-нд мэдээлэл хийлээ. Энэ үеэр Эко автомашин импортлогчдын холбооны тэргүүн Ц.Лхагважав хэлэхдээ,Улаанбаатар хотын түгжрэл, агаарын бохирдол, зам тээврийн ослын тоог бууруулах зорилгоор Улаанбаатар хотод олгох улсын бүртгэлийн дугаарын дээд хязгаарыг 730 мянгаар тогтоох шийдвэр арваннэгдүгээр сарын 8-наас хэрэгжиж эхэлсэн билээ. Энэхүү шийдвэрийн хүрээнд импортоор орж ирж буй автомашинд Улаанбаатар хотын серитэй улсын дугаар олгоход хязгаарлалт хийсэн. Энэхүү шийдвэр нь Монгол Улсын иргэн өмчтэй байх Үндсэн хуулиар олгогдсон эрхийг хязгаарласан байсан тул хэсэг иргэний төлөөлөл Үндсэн хуулийн цэцэд хандсан. Үүнээс үүдэн уг шийдвэрийг зөв, буруу хэмээн олон нийтийн дунд томоохон хэлэлцүүлэг үүсээд байна.

Энэ үйл явдалтай холбогдуулан Нийслэлийн Засаг дарга бөгөөд Улаанбаатар хотын захирагч Х.Нямбаатар НИТХ-ын анхдугаар чуулганд мэдээлэл өгөхдөө бизнес эрхлэгчдийг ёс бусаар хэлж, гүтгэсэнд гомдолтой байна. Сонгууль дууслаа одоо "Май шүү" гэдэг байдлаар хандаж болохгүй. Нийслэл Улаанбаатар хотын захирагч бөгөөд хотын дарга, өмнө нь Хууль зүйн сайдаар ажиллаж байсан хүн автомашин худалдан борлуулж байгаа иргэдийг бүдүүлэг үг хэллэгээр доромжилсонд харамсаж байна.Бид Монгол Улсад хууль ёсны дагуу албан ёсоор татвараа төлөөд эрэлт, нийлүүлэлт дээрээ тулгуурлан үйл ажиллагаа явуулдаг. Түгжрэл бол нийслэл Улаанбаатар хотын хүн амын өмнө тулгамдсан асуудал. Гэхдээ автомашины худалдаа эрхлэгчид энэ түгжирлийг бий болгоогүй. Улаанбаатар хотын түгжрэл бол өнгөрсөн 30 жилд нийслэл хотыг удирдаж байсан үе үеийн удирдлагуудын тооцоо судалгаагүй шийдвэр, газар олголттой шууд холбоотой. Хэрэв Х.Нямбаатар дарга хэлсэн үг үйлдэлдээ хариуцлага хүлээхгүй бол Ерөнхий сайд болон холбогдох албан тушаалтнуудад гомдол гаргах, шүүхэд хандах болно гэв. Юуны өмнө, бид түгжрэлийг шийдэхийг дэмжиж байгаагаа илэрхийлье. Харин Х.Нямбаатарыг суудлаас нь огцруулъя гэж акц зохион байгуулаагүй бөгөөд албан ёсны шаардлагуудыг холбогдох албан байгууллагад өгч, шийдүүлэхийг оролдож байсан болно. Тиймээс Нямбаатарыг ард иргэдээ ажил мэргэжил, нийгмийн байдлаар нь ялгаварлан гадуурхаж, доромжилсон тус үйлдэлдээ уучлал гуйхыг шаардаж байна. Цаашлаад ажил хэргийн нэр хүндэд учирсан хохирлоо нөхөн төлүүлэхээр шүүхэд хандах болохоо үүгээр мэдэгдэж байна.

Энэхүү хэвлэлийн бага хурлаар шийдвэр гаргах эрх бүхий хүмүүст 3 шаардлага тавьж байна.

1. Импортоор орж ирж буй автомашинд улсын дугаар олгох журмыг дахин боловсруулж, бизнес эрхлэгчдийн нөхцөл байдлыг тусгах. Тодруулбал, аливаа хууль, журмыг боловсруулахдаа эрх нь ашиг нь хөндөгдөж буй бизнесийн байгууллагыг хамгийн бага хохиролтой байлгахаар тусгах ёстой юм.
2. Ачигдаад ирж буй 37 мянга гаруй машинд улсын дугаар олгох. Улаанбаатар хотод бүртгэх авто машины дээд хэмжээг 730 мянга байхаар баталсан ч одоогийн байдлаар 800 мянга даваад байна.
3. Улсын бүртгэлийн дугаар авахад тавьж буй шаардлагын заримыг нь хасах. Тодруулбал, машиндаа улсын дугаар авахын тулд хувьдаа зогсоолтой, гарааштай байх ёстой гэж журамд тусгасан нь Монгол Улсын иргэнд Үндсэн хуулиар олгогдсон өмчтэй байх эрхийг зөрчиж байна. Мөэ 2015 оноос хойш үйлдвэрлэгдсэн, эко, 0 километртэй гэж шаардлага тавьсан нь 100-150 сая төгрөгтэй хүн л машин унаж, бусад нь алх гэснээс өөрцгүй юм.

Хэрэв эдгээр шаардлагыг биелүүлэхгүй бол бид тэмцлийн дараагийн шатанд шилжиж, суулт зарлах болно гэв.