Тээврийн хэрэгслийн улсын дугаар хадгалалтын жилийн төлбөрийг 20 мянган төгрөг болгосноо Авто тээврийн үндэсний төвөөс өнөөдөр (2024.11.18)мэдээлээд байна.

Тус төвөөс өмнө нь хуучин автомашинаа зарсан тохиолдолд дугаарыг нь хоногийн 5500 төгрөгөөр хадгалан, шинэ машиндаа зүүх боломжтой гэдгийг мэдэгдсэн. Мөн 180 хоног дугаарыг хадгалах боломжтой болохыг сануулж байв. Ингэснээр 30 хоног хадгалахад 165 мянган төгрөг, 90 хоног хадгалахад 495 мянган төгрөг, 180 хоног хадгалахад 990 мянган төгрөг төлөх болсон.

Гэвч төлбөрийн хэмжээ олон нийтийн шүүмжлэлтэй тулсан.

Автомашинтай болох гэж ядаж буй иргэнийхээ хэтэвчийг нимгэлэн, үйлийг нь үзэж эхэлсэн энэхүү шийдвэрээ эргэн харж, иргэдэд ээлтэй болгож, төлбөрийн хэмжээг бууруулж, хоногийг нь 365 болгон нэмэгдүүлсэнд олон нийт талархахын зэрэгцээ бас шүүмжилж байна.

Учир нь аливаа шийдвэрийг хэрэгжүүлэхээсээ өмнө судалгаа сайн хийж, амьдралд хэрэгжихүйц байхаар гаргахгүй бол иргэдийг хөлдөө чирээд зогсохгүй төрийн нэр хүндийг ч унагаж байна. Иймээс асуудал бүрт ултай суурьтай хандах ёстойг сануулж буй юм.

Г.ХОРОЛ