"The Moscow Times"-ийн мэдээлснээр, Оросын бизнес эрхлэгчид санхүүгийн хямралд орох эрсдэлтэй тулгараад байгаа бөгөөд үйл ажиллагаагаа зогсоож болзошгүй байдалд ойртжээ. Тус улсын төв банк хүүгээ 21 хувь болгосон. Энэ нь өнгөрсөн хоёр жилийн хугацаанд их хэмжээний өр тавьсан бизнесүүдэд сөрөг нөлөө үзүүлэх бөгөөд банкны хүү ирэх сард улам нэмэгдэх вий гэдгээс иргэд эмээж байна. Төв банк 2023 оны хоёрдугаар улирлаас хойш тогтвортой инфляцыг хянах, ганхаж буй рублийн ханшийг дэмжих зорилгоор бодлогын хүүгээ үе шаттайгаар нэмэгдүүлсэн. Гэсэн хэдий ч зээлийн асар өндөр өртөг төлж буй олон компани үндсэн хүүгийн төлбөрөө төлөхийн тулд олсон рубль тутмынхаа дөрөвний нэгийг зарцуулж байна. Мөн өндөр хүүтэй зээлийг төлж барагдуулах чадваргүй, удааж төлж байгаа иргэд, бизнес эрхлэгчдээс болж бүхэл бүтэн корпорацын салбарт хүндрэл учрах юм.

Хэрэв банкны хүү 25 хувьд хүрэх юм бол дампуурах эрсдэлтэй бизнес, дампуурлаа зарлах байгууллагуудын тоо нэмэгдэнэ гэж "Meduza" мэдээлэв.

Дайны өмнө бизнес эрхлэгчдийн дөнгөж 20 хувь нь хөвөгч хүүтэй байжээ. Гэвч 2023 оны дунд үе гэхэд Төв банкны үндсэн хүүтэй уялдуулж зээл авсан бизнес эрхлэгчдийн 44 хувь нь хөвөгч хүү төлдөг гэх судалгаа гарсан байна. Хориг арга хэмжээ хэрэгжиж эхэлсний дараа импортын орлогыг дэмжих, гадаадын санхүүжилтээ алдсан олон компани алдагдлаа нөхөхийн тулд зээл авсан байдаг. Тухайн үед эдгээр пүүс, бизнес эрхлэгчид зээлийн хүү тогтвортой байна эсвэл буурна гэж таамаглаж байснаараа эндүүрсэн юм. Учир нь тус улсын засгийн газар батлан хамгаалах салбартаа их хэмжээний хөрөнгө мөнгө зарснаар инфляцыг хөөргөсөн юм. Мөн Төв банк зээлийн хүүгээ чангаруулах алхмыг эхлүүлсэн бөгөөд энэ нь хараахан дуусах болоогүй гэж эдийн засагч нар үзэж байна.

Рублийн ханш суларч, засгийн газрын зардал нэмэгдсэнтэй зэрэгцэн инфляц өмнөх оны мөн үеэс өссөн нь 2024 оны сүүл үе гэхэд хөвөгч хүүтэй компаниуд 55 хувьд хүрсэнтэй холбоотой юм.

Энэ нь мөн гадаад валютын ханш өсөхөд нөлөөлсөн байдаг. Түүнчлэн, санхүүгийн шинэ хязгаарлалт гарч магадгүй тул бизнес эрхлэгчид нэмэлт зээл авахаар уралдаж, зээлийн эрэлт нэмэгдэж байна. Тодруулбал, энэ оны эцэс гэхэд зээл авахад шаардагдах стандартыг чангатгаж, мөрдөж эхлэх тул өнгөрсөн 11 сарын хугацаанд зээл хүсэгчдийн тоо 22 хувиар нэмэгдэхэд хүргэжээ. Нөхцөл байдал ирэх онуудад улам дордох төлөвтэй байна. Тус улсын эдийн засаг 2023 онд 3.6 хувиар гэнэтийн өсөлттэй байснаар өрийн асуудал тийм ч томоохон асуудал байгаагүй аж. Гэвч 2025 он гэхэд эдийн засгийн уналт эрчээ авч, бизнес эрхлэгчдэд дарамт учруулна гэж "IntelliNews" мэдээлэв. Украин дахь дайн үргэлжилсээр байгаа цагт Төв банк мөнгөний бодлогоо зөөлрүүлэхгүй нь ойлгомжтой юм.

Холбооны Дампуурлын мэдүүлгийн нэгдсэн бүртгэлийн газрын (Fedresurs) мэдээлснээр, зээлийн хүүгийн түвшин нэмэгдэж, пүүсүүдийг санхүүгийн сүйрэлд ойртуулж байгаа тул Орост аж ахуйн нэгжийн дампуурал энэ онд 20 хувиар өссөн байна.

Мөнгөний хатуу бодлого өрийн хэмжээг улам бүр тогтворгүй болгосон тул төлбөрийн чадамжгүй бизнес эрхлэгчдийн хэмжээ ирэх оны эхний улиралд улам нэмэгдэх хандлагатай байгаа юм. Өмнө нь нийт бизнес эрхлэгчдийн 22 хувь нь зээлээ төлж барагдуулж чадахгүй байдалтай тулгардаг байсан бол одоо 37 нь болсон гэж Оросын үйлдвэрчид, бизнес эрхлэгчдийн холбоо (RSPP) мэдээллээ. Учир нь эргэлийн хөрөнгө олоход хүндрэлтэй болж олон компани ханган нийлүүлэгч болон бусад зээлдүүлэгчдийн төлбөрийг хойшлуулахаас өөр аргагүйд хүрсэн аж. Түүхээс харахад корпорацын дампуурал, бондын дефолт нь хүүгээ өсгөснөөс хойш 3-6 сарын дараа олшрох хандлагатай байдаг гэж "Meduza" мэдээлсэн бөгөөд энэ нь компаниуд удахгүй бондын эргэн төлөлттэй тулгарч магадгүйг илтгэж байна. Олон компанийн бондын хугацаа энэ оны дөрөвдүгээр улиралд дуусч байгаа нь дахин санхүүжилт олох асуудлыг өдөөх болжээ. “Северсталь” гангийн үйлдвэрийг үүсгэн байгуулагч олигарх Алексей Мордашов “Одоогийн хүүгийн хэмжээгээр компаниуд үйл ажиллагаагаа үргэлжлүүлж, эрсдэлээ үүрэхээс илүүтэйгээр өргөтгөлөө зогсоож, бүр цомхотгож, банканд хөрөнгө байршуулах нь илүү ашигтай" гэж үзэж байна.