Хаан Чарльзыг Канберрад өнгөрсөн сард айлчлах үеэр түүнийг доромжилсон нутгийн уугуул сенатчийг Австралийн хууль тогтоогчид шүүмжилж, арга хэмжээ авах шаардлагатай хэмээн санал нэгджээ. Тодруулбал, Австралийн парламентын их танхимд хаан Чарльз колоничлолын үр дагаврын талаар үг хэлж байхад уугуул иргэн, сенатч Лидия Торп "Чи миний хаан биш", "Энэ чиний газар нутаг биш" гэж орилжээ.

Тус улсын сенатын хуулийн 46.12-ын дагуу Торпын үйлдлийг үл хүндэтгэсэн, үймээн дэгдээсэн гэж үзэж, парламентын танхимд төлөөлөгч байх эрхгүй хэмээн гишүүд санал нэгджээ.

Гэхдээ парламентын гишүүд санал нэгдэж Торпыг шүүмжилж, буруутгаж буй нь улс төрийн бэлгэдлийн чанартай бөгөөд үндсэн хууль, эрх зүйн ач холбогдолгүй юм. Сенатчидын санал хураалт Даваа гаригт явагдаж дууссаны дараа Торп сэтгүүлчдэд "Нислэг хоцорсны улмаас танхимд үг хэлэх эрхийг минь хассан" гэж мэдэгджээ.

Мөн "Британийн хаант засаглал манай орны анхны иргэдийн эсрэг жигшүүртэй гэмт хэрэг үйлдсэн. Би хэзээ ч үүнийг дуугаа хураагаад чимээгүй өнгөрөөж чадахгүй" гэжээ.

Өнгөрсөн сард Торп эсэргүүцлээ илэрхийлснээр зарим нутгийн уугуул иргэд болон Торресын хоолойн арлын хэд хэдэн удирдагчдын дургүйцлийг хүргэсэн юм. Гэсэн хэдий ч түүнийг  Австралийн уугуул иргэдийн эрх ашгийн төлөө дугарсан, колоничлолын гэмт хэргийг буруутгасан хэмээн магтан сайшаасан хүмүүс байсан бөгөөд дэмжинэ гэдгээ илэрхийлжээ. Хэдийгээр Торп эсэргүүцлээ илэрхийлсэн ч хаан Чарльз, хатан Камилла нарыг Австралийн иргэд халуун дулаанаар угтан авсан байдаг.