Монголын волейболын холбооны зохион байгуулдаг үндэсний дээд лигийн шинэ улирал эхлээд удаагүй байна. Сүүлийн жилүүдэд Монголд хурдацтай хөгжиж буй спортын төрөл бол яахын аргагүй волейбол. Жилээс жилд үзэгчдийн тоо, багуудын чанар чансаа нэмэгдэж, өрсөлдөөн ширүүсч үүнийгээ дагаад зах зээл нь томорч байна. Саяхан Спортын төв ордонд тоглолтуудаа хийдэг байсан дээд лиг өнгөрсөн жилээс AIC Steppe Arena руу нүүж, шинэ өнгө төрхийг цогцлоосон.

Энэ улирлын улирлын дээд лиг эрэгтэй ес, эмэгтэй долоон багтайгаар эхэлж, тунчиг сонирхолтой өрнөх шинжтэй. Зарим багууд хүч сэлбэж, бүрэлдэхүүнээ хүчирхэгжүүлсэн бол зарим нь залуу тоглогчдод боломж олгож, гэнэтийн бэлэг бариад байна. Хуучны Өмнөговь Шанх Транс баг бүрэн утгаараа өөрчлөгдөж, SG Hawks гэх нэртэй болсон нь шинэ улирлын эхний гэнэтийн бэлэг байлаа.

Мөн олон гайхалтай легионер тамирчид хүрэлцэн ирсэн. Тухайлбал, Натур Бакс багийн ботсвани тамирчин Игобе Сикуку. Түүний хувьд сүүлд Өмнөговь Энержи багийн эсрэг 23 оноо, 16 довтолгоо амжилттай гүйцэтгэж, таван хаалт тавьжээ.

Түүнээс гадна Enacoree багийн легионер И Жинийг онцолж болно. Өдгөө 23 настай холбон тоглогчийн хувьд Өмнөд Солонгосын дээд лигийн "IBK Altos" болон Дэгү Сити багуудад тоглож явсан аж.

Өчигдөр/2024.11.17/ Хасу Мегастарс болон Минтонетт Говь багуудын тоглолт болж, дээд лигийн арвин амжилттай, энэ улирал аваргын төлөө өрсөлдөх амбицтай Хасу Мегастарс баг өрсөлдөгчөө 3-1 гэсэн харьцаатай хожжээ. Угтаа Минтонетт Говь тоглолтын явцад сетийн харьцааг тэнцүүлж, 1-1 болгосон ч хүчирхэг Мегастарсыг зогсоож чадсангүй.

Хасу Мегастарс, Натур Бакс, SG Hawks тэргүүтэй багууд аваргын төлөөх гол өрсөлдөөнийг үзүүлж байна.

Минтонетт Говийн эмэгтэй баг нь ч ялагдал амссан. Тэд Хөвсгөл Эрчим багийг дийлсэнгүй. Хөвсгөл Эрчимээс куба тамирчин Корреоко Арлин багаа тэргүүлж, 19 оноо авч, 18 довтолгоо амжилттай гүйцэтгэжээ. Харин Ховд Ижил Алтай Торгууд болон Энагурэ багуудын тоглолтод Ховд илт илүүрхэж, 3-0 гэсэн харьцаатай ээлжит ялалтаа авав.

Волейболын дээд лигийн нэгдүгээр тойргийн тоглолтууд арваннэгдүгээр сарын 23-ныг хүртэл AIC Steppe Arena-д үргэлжлээд, хоёрдугаар тойргийн тоглолтууд арванхоёрдугаар сард орон нутгаар аялж, финалын тоглолтууд 2025 оны нэгдүгээр сараас AIC Steppe Arena-д эргэн ирнэ.

Та бүхэнд маргаашийн тоглолтуудын хуваарийг танилцуулъя. Тасалбарыг энд дарж авна уу.