Улаанбаатар хотын захирагч Х.Нямбаатар захирамж гарган, Нийслэлийн иргэдийн төлөөлөгчдийн хурал /НИТХ/-ын төлөөлөгч Б.Энхжаргаланг “Төв цэнгэлдэх хүрээлэн” ХХК-ийн гүйцэтгэх захирлаар, Б.Одсүрэнг Нийслэлийн орон сууцны корпорацийн захирлаар тус, тус томилжээ.

Б.Энхжаргалангийн хувьд хуучин албан тушаалдаа эргэн томилогдсон гэж хэлж болно.  Учир нь, НИТХ-наас өнгөрсөн онд “Төв цэнгэлдэх хүрээлэн” ХХК-ийг 100 хувь нийслэлийн өмчид авсны дараа буюу дөрөвдүгээр сард Б.Энхжаргаланг тус хүрээлэнгийн захирлаар томилсон юм. Гэвч тэрбээр өнгөрсөн есдүгээр сард чөлөөлөгдөх хүсэлт гаргасан нь НИТХ-ын сонгуульд өрсөлдөх болсонтой холбоотой байв. Хан-УУл дүүрэгт өрсөлдөн ялалт байгуулснаар НИТХ-ын төлөөлөгч болсон.

Компьютер механик, менежментийн сургууль Мэдээллийн системийн менежмент, IT инженерээр төгссөн байдаг.

Харин Б.Одсүрэнгийн тухайд өнгөрсөн дөрвөн жилд НИТХ-ын төлөөлөгч, мөн Нийслэлийн зам, тээврийн асуудал хариуцсан төслүүдийн удирдагчаар ажиллаж байсан юм.

Энэ албыг хашихаас өмнө “Метро девелопмент групп”-ийг үүсгэн байгуулж, барилгын салбарт хүч үзэж байсан гэж хэлж болно.

МАН энэ удаагийн орон нутгийн сонгуульд өрсөлдөхдөө нийслэлд “20 минутын хот” байгуулах амлалт өгсөн. Тиймээс ирэх дөрвөн жилд нугалах ёстой хамгийн том ажил нь гэр хорооллыг барилгажуулж, агаар хөрсний бохирдлыг бууруулах ёстой.

Энэ ажлыг гүйцэтгэхдээ дэд төвүүдийг түшиглэн “20 минутын хот” байгуулахаар төлөвлөсөн бөгөөд “Сэлбэ” дэд төв, “Баянхошуу” дэд төв, “Шар хад” дэд төвүүдийг түшиглэн газраа чөлөөлсөн айлын газар дээр орон сууц барьж эхэлсэн. Энэ он дуусахаам өмнө “Баянхошуу” дэд төвийг түшиглэн эхний ээлжийн байр ашиглалтад орох учиртай.

Энэ бүх том ажлын эрчийг сааруулахгүйгээр авч явах үүргийг Б.Одсүрэн хүлээгээд байна.

Г.ХОРОЛ