АНУ-ын ерөнхийлөгч Жо Байден албан тушаалаа өгөхөөсөө өмнө Украинд хөдөлшгүй тусламж олгохоор зорьж буй. Тэрбээр АНУ-аас Украинд олгосон алсын тусгалт пуужинг Оросын газар нутагт ашиглах зөвшөөрлийг ногоон гэрлээр олгожээ. Өнгөрсөн хугацаанд ерөнхийлөгч Володимир Зеленский барууны орнуудад уг пуужинг ашиглах зөвшөөрөл олгохыг удаа дараа хүсч, санал хүргүүлж байсан.

Улмаар тус улс "ATACMS" онц аюултай пуужинг ашиглах боломжтой болжээ.

Оросын ерөнхийлөгч Владимир Путин өмнө нь барууны орнуудад Украинд туслахгүй байх анхааруулга өгч, хэрэв зэр зэвсгээр хангах, пуужин ашиглах зөвшөөрөл олговол "NATO"-ийн орнууд мөн адил дайнд оролцож байна гэж үзнэ хэмээн мэдэгдэж байв. Өнгөрсөн Бямба гаригт Жо Байден ногоон гэрлээр Украинд зөвшөөрөл олгосон явдалд Кремлийн зүгээс албан ёсны хариу мэдэгдэл гаргаагүй ч зарим эрх баригчид асуудлыг хурцатгасан гэж буруутгасан байна. "ATACMS" ашиглах зөвшөөрөл олгосон нь наймдугаар сард Курск мужид Киев гэнэтийн дайралт хийсэнтэй холбоотой юм.

Тодруулбал, Украины батлан хамгаалах хүчнийг хамгаалах зорилгоор Оросын хүчийг хязгаарлаж, алдсан газар нутгийг эргүүлэн авахад тусална гэж Байдены засаг захиргаа үзэж байна.

Мөн Оросын багахан хэмжээний газар нутгийг эзлэн авч, ирээдүйд хэлэлцээр хийхэд дөхөм болно гэж найдаж байна. Киевт төвтэй Украины Аюулгүй байдал, хамтын ажиллагааны төвийн дарга Серхи Кузан "ВВС"-д өгсөн ярилцлагадаа Жо Байдены шийдвэр тус улсын хувьд маш чухал гэж онцолсон. Тэрбээр " Энэ нь дайны явцыг өөрчлөхгүй ч манай цэргийн хүчийг дайсны талтай дүйцэх хэмжээнд хүргэнэ" гэжээ. "ATACMS" нь 300 километр замыг туулах чадвартай, дуунаас хурдан баллистик пуужин юм. Жо Байден ирэх нэгдүгээр сард Цагаан ордныг орхино. Улмаар Дональд Трамп ерөнхийлөгч болсноор Украинд хүрэх тусламжийн цуваа зогсонги байдалд орж болзошгүй юм. Өнгөрсөн хугацаанд Киевт 55.5 тэрбум ам.долларын тусламж хүргэсэн АНУ хамгийн зэвсэг нийлүүлэгч гэх тодотголтой болоод буй.

Тиймээс цонх үеэ ашиглаж буй Жо Байден Украинд нэмэлт тусламж хүргэх алхмуудыг дахин хийж магадгүй юм.