Германы канцлер Олаф Шольц, Оросын ерөнхийлөгч Владимир Путин нар хоёр жилийн дараа анх удаа утсаар ярилцлаа. Эх сурвалжийн мэдээлснээр, удирдагчид Оросын Украин дахь дайны талаар санал зөрөлдсөн хэвээр байсан аж.  Германы албаныхны мэдээлснээр, канцлер Оросын түрэмгийллийг буруутгаж, Хойд Солонгосын цэргүүдийг дайнд оролцуулж буй нь мөргөлдөөнийг улам өргөжүүлнэ гэж анхааруулсан байна.

Мөн Оросыг цэргээ татаж, Украинд шударга, урт удаан энх тайван тогтоохын тулд Киевтэй хэлэлцээ хийхийг уриалжээ.

Үүний хариуд Путин хэлэлцээ хийхэд нээлттэй байгаагаа илэрхийлсэн байна. Гэхдээ аюулгүй байдлын ашиг сонирхлыг харгалзан үзэж, Оросын "шинэ нутаг дэвсгэрийн бодит байдал" гэх зүйл дээр үндэслэх ёстой гэж мэдэгдсэн байна. Тэрбээр Украины дөрвөн бүс нутгийг Оросын газар нутаг болсон цагт дайныг зогсоох болно гэжээ.

Оросын ерөнхийлөгчийн тамгын газар 2022 онд Украины зүүн хэсэгт орших Донецк, Луганск, өмнөд хэсгийн Херсон, Запорожжиа хотуудыг нэгтгэх тухай мэдэгдэж байсан.

Украины ерөнхийлөгч Зеленский Герман, Оросын удирдагчид утсаар ярьсан талаар хэлэхдээ "Шольцын дуудлага пандорагийн хайрцгийг нээж байна. Тиймээс маш олон яриа, дуудлага хийх шаардлага гарч магадгүй" гэжээ.