Энэ сарын 14-ны өдөр орсон цасны улмаас зам даваа халтиргаа гулгаа үүсчээ. Тодруулбал, Өлгий- Цагааннуур улсын хил чиглэл дэх Зээгтийн даваанд зорчих хэсэгт халтиргаа, гулгаа үүсч мөстсөн байна. Улмаар тухайн хэсгийг Зам арчлалт засварын газрынхан автогрейдерээр цэвэрлэж, тээврийн хэрэгслийг даваагаар саадгүй өнгөрүүлэх боломжтой болгожээ. Мөн Ховд-Өлгий чиглэлийн Бураатын даваанд цасан шуурганы улмаас зорчих хэсэгт хэсэгчлэн хунгарлагдаж мөстөж, дагтаршсан хэсгийн цасыг авто ачигч болон автогрейдерээр цэвэрлэн шуурхай ажиллажээ. Үүнээс гадна Дархан-Сүхбаатар чиглэлд халтиргаа үүссэн хэсэгт давс бодис цацаж аюулгүй болгожээ.

Мөн Дархан, Сэлэнгэ аймгийн нутгаар цас орж, зорчих хэсэгт халтиргаа, гулгаа үүссэн тул анхаарал болгоомжтой зорчихыг Зам тээврийн хөгжлийн төвөөс анхааруулав.

Тиймээс иргэд дээрх аймгууд руу зорчих гэж байгаа бол анхаарал болгоомжтой байж, хурдаа тохируулж, тээврийн хэрэгслийн бүрэн бүтэн байдлыг шалгаж явахыг  санууллаа.