Гүржийн салан тусгаарласан бүс нутаг Абхазын парламентын танхим болон түүнтэй нэг дор байрлах Ерөнхийлөгчийн тамгын газрын байр руу жагсагчид Баасан гаригт дайран оржээ. Жагсагчид улстөрчдийн ОХУ-тай байгуулсан хөрөнгө оруулалтын гэрээг эсэргүүцэж, ерөнхийлөгчөө огцрохыг шаардав. Мөн парламентын ордоныг тойрсон төмөр хаалгыг ачааны машин ашиглан эвдэлсэн байна.

Сөрөг хүчний удирдагч, ерөнхий прокурорын орлогч асан Эшсоу Какалиа парламентын ордон жагсагчдын хяналтад байгаа гэж мэдэгджээ.

ОХУ-ын Эдийн засгийн сайд Максим Решетников болон Абхазын сайд Кристина Озган нар өнгөрсөн оны аравдугаар сард Москва хотноо хөрөнгө оруулалтын гэрээ байгуулсан. Энэ гэрээг соёрхон батлах асуудлаар хууль тогтоогчид Баасан гаригт санал хураалт явуулах байжээ. Москватай байгуулсан гэрээ нь Оросын хуулийн этгээдүүдийн хөрөнгө оруулалтын төслүүдийг хэрэгжүүлэх боломжийг олгоно гэж сөрөг хүчнийхэн үзэж байна.

"Иргэд болон тэдний бизнесийн эрх ашгийг хамгаалах гэсэн ганцхан шаардлагыг л эрх баригчдад тавьсан. Гэвч ерөнхийлөгч ч, парламент ч ард түмнийхээ дуу хоолойг өнөөдрийг хүртэл сонсоогүй" гэж жагсагчид мэдэгджээ.