Боловсролын сайд П.Наранбаяр өнгөрсөн долдугаар сард Монгол Улсын хэмжээнд 4217 багш мэргэжилтний сул орон тоо байна гэж мэдээлсэн. Тэгвэл 2024 оны аравдугаар сарын 18-ны байдлаар 4217 сул орон тооны 3200 орчим нь нөхөгдсөн гэдэг мэдээллийг Боловсролын ерөнхий газраас өглөө. Багш бэлтгэх 45 хоногийн курсын талаар тус газрын дарга Т.Ням-Очироос тодруулга авлаа.

Тэрбээр "Монгол Улсын хэмжээнд 4217 багш мэргэжилтний сул орон тоо байна гэж мэдээлсэн. Энэ бол 2024 оны долдугаар сарын 20-нд цуглуулж, албан ёсоор зарласан тоо. Бага, дунд боловсролын албан ёсны статистик мэдээн дээр багшийн сул орон тоо гэдэг маягт байдаг. Энэ маягтын дагуу мэдээллийг хуулийн хугацаанд буюу 2024 оны зургадугаар сард цуглуулж, долдугаар сарын 20-нд олон нийтэд зарласан. Есдүгээр сарын 15-ны байдлаар энэ сул орон тоо 2000 руу дөхсөн бол аравдугаар сарын 15-ны байдлаар дахин 1000 орон тоо нэмж нөхөгдсөн. Аравдугаар сарын 18-ны байдлаар 4217 сул орон тооны 3200 орчим нь нөхөгдсөн байсан. Арваннэгдүгээр сарын судалгаа хараахан гараагүй байна.

2023-2024 оны хичээлийн жилд багш мэргэжлээр 2800 гаруй оюутан бакалаврын түвшинд багшлах дипломтой төгссөн. Эсрэгээрээ 4200 гаруй орон тоо дутагдаж байгаа тооцоо судалгаа байгаа. Одоогийн байдлаар тэтгэвэрт гарсан 1200 гаруй багш хүсэлтээ гаргаад, үргэлжлүүлэн ажиллаж байна.

Мөн цэцэрлэг, сургууль нийлээд 750 гаруй төгсөх курсийн оюутнууд багшлах дадлагаа хийнгээ цалинтай ажиллаж байна. Бас цагийн багшаар их сургуулийн багш нар ажиллаж байна гэх мэт бид түр хугацааны зохицуулалтыг хийж, багшийн сул орон тоогоо бүрэн нөхөгдөх хүртэл багш бэлтгэх их сургуулиудтай хамтран ажиллаж байна. Магадгүй өндөр түвшний академик боловсрол эзэмшсэн физик, хими, хэрэглээний математикч, цөмийн физикч зэрэг хүмүүс багшлах сонирхолтой байвал хүүхэдтэй харилцах чиглэлийн ур чадварыг эзэмшүүлж, багшлах эрх олгоно" гэсэн юм.

Мөн тэрбээр үргэлжүүлэн мэдээлэл өгөхдөө "Боловсролын сайдын 2024 оны есдүгээр сарын 2-ны өдрийн А/64 тушаалаар багшлах эрхийн гэрчилгээ олгох түүнтэй холбоотой асуудлыг зохицуулах журам батлагдсан. Энэ журмаар гурван төрлийн багшлах эрхийн гэрчилгээг тусгасан байдаг. Нэгдүгээрт, сургуулийн өмнөх болон ерөнхий боловсролын сургуульд багшлах сонирхолтой, дүйцэх түвшний бакалаврын дээд боловсрол эзэмшсэн болон энэ чиглэлээр төгсөх курст суралцаж байгаа оюутнуудад багшлах эрх олгоно. Хоёрт, мэргэжлийн боловсролын сургууль буюу политехникийн коллежид яг мэргэжлийн чиглэлээр багш бэлтгэх. Жишээлбэл, гагнуурчин бэлтгэх чиглэлээр сургаж, багшлах эрх олгоно гэсэн үг. Гуравт, түр буюу богино хугацааны сургалтууд дээр хичээл заах хүмүүст багшлах эрх олгох сургалтыг явуулна.

Журмаар зохицуулснаар Боловсролын ерөнхий газар багшлах эрхийн сургалтыг зохион байгуулах сургалтын байгууллагыг бүртгэн авч, тэнд сургаж төгсгөсөн хүний нөөцийг бүртгэж, мэдээллийн сан үүсгэнэ.

Тухайн эрх авсан сургалтын байгууллагууд бүртгэлээ хийж, сургалтаа зохион байгуулах чиглэлтэй ажиллана. Журмын 3.2 зүйлд багшлах эрхийн гэрчилгээ олгох сургалтын хөтөлбөрт Боловсролын судалгааны үндэсний хүрээлэн дүгнэлт гаргахаар заасан. Мөн журмын 4.3.2 зүйлд магадлан итгэмжлэлийн тухай заалттай холбоотойгоор магадлан итгэмжлэгдсэн 12 сургалтын байгууллагатай 2-3 удаагийн уулзалтыг зохион байгуулсан. Эдгээр сургуулиуд өөрсдийн бэлтгэл ажил, зохион байгуулалтын талаар мэдээллээ өгсөн байдаг. Өнөөдрийн байдлаар Боловсролын судалгааны үндэсний хүрээлэнгээс ирсэн албан бичгээр таван их сургууль хөтөлбөрөө хянуулж, дүгнэлтээ авч, сургалтаа эхлүүлэх зараа тавиад байна. Тодруулбал, МУБИС, Олон улсын Улаанбаатар эрдэм их сургууль, СЭЗИС-ийн харьяа Боловсролын их сургууль, Орхон, Отгонтэнгэр их сургууль дүгнэлтээ гаргуулсан. Энэ долоо хоногоос дүгнэлтүүд гарч байгаа учраас багшлах хүсэлтэй хүмүүсийн бүртгэлийн явцын мэдээлэл хараахан ирээгүй байна.

Журамд багшлах эрхийн гэрчилгээ олгох сургалт нь 45 хоногоос ихгүй хугацаатай байна гэж тусгасан бөгөөд сургалтыг цахим, танхим хосолсон хэлбэрээр зохион байгуулж болно.

Хөтөлбөрийн агуулгын хувьд хүүхдийн эрх хамгаалал, суралцахуйн онол арга зүй, тухайн түвшний боловсролын сургалтын хөтөлбөр, сургалтын хөтөлбөрийг хэрэгжүүлэх технологи,  үнэлгээ гэсэн тодорхой таван чиглэлээр сургалтын хөтөлбөрөө боловсруулсан байна. Энэ хүрээнд Боловсролын судалгааны үндэсний хүрээлэн энэ таван чиглэлээр тавигдах шаардлагаа тавьж, их сургуулиуд багш бэлтгэх хөтөлбөрөө боловсруулж, дүгнэлт гаргана" гэв.