Оросын засгийн газрын тогтоолын дагуу Москвагийн дөрвөн нисэх онгоцны буудал, Казахстантай хиллэх боомтоор дамжин тус улсад нэвтрэх гадаадын иргэд арванхоёрдугаар сараас эхлэн биометрийн шаардлага хангах ёстой болжээ.

Тодруулбал, хилээр нэвтрэх шалган дээр хурууны хээ болон царайгаа таниулдаг болно. Уг дүрэм арванхоёрдугаар сарын 1-нээс эхлэх бөгөөд 2026 оны зургадугаар сарын 30 хүртэл туршилтын журмаар хэрэгжинэ гэж эрх баригчид мэдэгджээ. Түүнчлэн 2025 оны зургадугаар сарын 30-наас эхлэн Оросын бүх хилийн шалган нэвтрүүлэх боомтуудад уг биометрийн системийг нэвтрүүлэх юм байна.

Орост виз мэдүүлэхгүйгээр нэвтрэх боломжтой орны иргэд царай, хурууны хээгээ утасны аппликейшн ашиглан биометрийн системд таниулах боломжтой. Харин тус улсад нэвтрэхийн тулд виз мэдүүлэх шаардлагатай орны хүмүүс хилийн шалган нэвтрэх дээр биометрийн системд царай, хурууны хээгээ таниулах юм. Гадаадаас ирэх хүмүүсийн биометрийн мэдээлэл нь нэгдсэн санд төвлөрөх бөгөөд үүнийг цагдаа, тагнуулын байгууллагууд шаардлагатай тохиолдолд ашиглана.

“Гадаадын иргэн, харьяалалгүй хүний ​​биометрийн хувийн мэдээллийг туршилтад хамрагдсан эрх бүхий байгууллага, байгууллагын төрийн мэдээллийн системд шилжүүлж, таних, баталгаажуулна” гэж тогтоолд заасан байна. Дипломат, олон улсын байгууллагын ажилтан, Беларусийн иргэн болон зургаа хүртэлх насны хүүхдүүд биометрийн шаардлагаас чөлөөлөгдөнө. Уг тогтоолыг хэрэгжих болсонд Оросын эрх баригчид таатай хүлээн авч байгаа бол хүний эрхийн бүлгүүд шүүмжилж байна.