Нийслэлийнхний хувьд хөл дүүжлэх унаатай болно гэдэг амаргүй ажил болж хувираад байна. Учир нь, унаж байсан автомашинаа зарахдаа хуучин дугаараа хадгалах боломжтой тухай Авто тээврийн үндэсний төвөөс мэдэгдсэн. Гэвч улсын дугаарыг хадгалахад хоногийн 5500 төгрөгийн төлбөр төлнө. 

Журамд зааснаар эхний удаад 90 хоног дугаараа хадгалах боломжтой. Энэ хугацааг дахин 90 хоногоор сунгуулснаар нийтдээ 180 хоног улсын дугаарыг хадгалж болно. Гэвч хэр удаан хугацаанд дугаар хадгална, тэр хэрээр хэтэвчнээс гарах мөнгөний хэмжээ нэмэгдэнэ.  Тухайлбал, арав хоног дугаар хадгалахад 55 мянган төгрөг төлөх шаардлагатай бол 30 хоног хадгалахад 165 мянган төгрөг, 90 хоног хадгалахад 495 мянган төгрөг, 180 хоног хадгалахад 990 мянган төгрөг төлөх юм.

Нэг үгээр хэлбэл, хуучин дугаараа хадгалж байгаад шинэ машиндаа “зүүнэ” гэдэг нь бас л мөнгө шаардсан ажил болж хувираад байна. Үндсэндээ шинэ дугаар авсан ч, хуучин дугаараа хадгалах хоёрт ялгаа бараг үгүй болж буй юм.

Г.ХОРОЛ