Шархадсан орос цэргүүдийн эмнэлгийн төлбөрт Кремль шинэ хязгаарлалт хийж эхэлжээ. Дайны эхэн үед тулаанд шархадсан цэрэг нэг бүрт 30 мянган ам.доллар олгоно гэж амлаж байв. Тэгвэл зөвхөн хүнд гэмтэл авсан тохиолдолд л 30 мянган ам.доллар олгохыг зөвшөөрсөн тогтоолыг Кремль Лхагва гаригт батлав. Харин хүндэвтэр гэмтэлд 10 мянган ам.доллар, бусад тохиолдолд 1000 ам.доллар олгоно. Зарлигийг тус улсын ерөнхий сайд Михайл Мишустин баталлаа.

30 мянган ам.доллар авах гэмтлийг нэгдүгээр зэргийн гэмтэл гэж тодорхойлох ба энэ нь амь нас, эрүүл мэндэд нь аюул учруулах эсвэл эд эрхтэнд нь их хэмжээний хохирол учруулж болзошгүй тохиолдлыг хэлнэ. Үүнд, нуруу нугас, тархи, бэлэг эрхтний хүнд гэмтэл, хавирга, мөч хугарах, уушги, бөөр зэрэг эрхтний гэмтэл багтах юм.

10 мянган ам.долларын гэмтэл нь хоёрдугаар зэрэг гэж тодорхойлогдоно. Үүнд, бага зэргийн хугарал, тархины доргилт, нүдний нэг, хоёрдугаар зэргийн түлэгдэлт, шагай булгарах, сумны шарх зэрэг түр зуурын шарх орох юм.

Украины зүүн хэсэгт амь үрэгдэгсэд, шархдагсдын тоо улам нэмэгдсээр буй. Энэ нь тэдний ар гэрийнхэнд олгох нөхөн олговрын зардлыг өсгөх төлөвтэй байна. ОХУ амь үрэгдэгсэд болон шархадсан хүмүүсийн нөхөн төлбөрт 2.3 их наяд рубль буюу одоо 23 тэрбум ам.доллар зарцуулах шаардлагатай гэж барууны судлаачид өнгөрсөн долдугаар сард тооцоолжээ. Энэ нь тус улсын нийт төсвийн зургаа орчим хувь юм.