АНУ-ын шинэ ерөнхийлөгч Дональд Трамп ирэх оны нэгдүгээр сарын 20-нд тангаргаа өргөнө. Тэр хүртэлх хугацаа бол Жо Байдены хувьд чухал шийдвэрүүдээ амжиж гаргах цонх үе гэж үзэж буй. Тиймээс Байдены засаг захиргаа эрх мэдлийнхээ сүүлийн саруудад Украинд ирэх жил Оросын түрэмгийллийг эсэргүүцэхэд нь хүрэлцэхүйц аль болох их тусламж илгээхээр шийджээ.

"Ерөнхийлөгч Байден нэгдүгээр сарын 20-ны өдрийг хүртэл өөрийн мэдэлд байгаа ам.доллар нэг бүрийг гаргана гэж амласан" тухай АНУ-ын Төрийн нарийн бичгийн дарга Энтони Блинкен хэлэв. НАТО-ийн орнууд Украиныг 2025 онд үр дүнтэй тулалдах боломжоор нь хангахын тулд хүчин чармайлтаа эрчимжүүлэх ёстой гэж Блинкен үзэж байна.

Трампийн удирдлага дор АНУ-ын засаг захиргаа дайны бодлогоо хэрхэн өөрчлөх нь тодорхойгүй. АНУ-ын цэргийн тусламж Украины хувьд амин чухал боловч Трамп Киевт олон тэрбум ам.доллар өгөхийг хүсэхгүй байгаагаа илэрхийлсээр ирсэн билээ.

Гэтэл бараг гурван жил үргэлжилж буй дайн зогсох шинж тэмдэггүй байна. ОХУ-ын арми өнгөрсөн Лхагва гаригт Украины найман бүс нутгийг онилж, зургаан баллистик болон далавчит пуужин, 90 нисгэгчгүй онгоц харважээ. Энэ нь сүүлийн хоёр сар гаруй хугацаанд анх удаа пуужин, нисгэгчгүй онгоц хослуулан довтолсон тохиолдол юм. Агаарын довтолгооноос хамгаалах хүчнийхэн дөрвөн пуужин, 37 нисгэгчгүй онгоцыг устгажээ. Харин 47 нисгэгчгүй онгоцыг цахим байдлаар саатуулсан байна.