Жүжигчин Ч.Ундрал Монголын Кино урлагийн зөвлөлийн Ажлын албаны даргаар томилогдсон цагаасаа олны шүүмжлэлд өртсөн. Тэрбээр өнгөрсөн хугацаанд дэвтрийн нүүрэнд багтахааргүй их ажил хийсэн гэв.

Кино урлагийн салбарын уран бүтээлчдийн зөвлөгөөнийг өнөөдөр /2024.11.14/ "Блю скай" зочид буудлын танхимд зохион байгуулж байна. Зөвлөлөөс хоёр дахь удаагаа зохион байгуулж байгаа хурал дээр салбар яам болон Кино зөвлөлийн үйл ажиллагааг шүүмжлэх уран бүтээлч цөөнгүй байлаа. Харин Зөвлөлийн дарга Ч.Ундрал хийж хэрэгжүүлж буй ажлынхаа талаар ярихдаа "Манай зөвлөл байгуулагдаад хоёр жил болж байна. Мөн Кино урлагийг дэмжих тухай хууль батлагдаад хоёр жил болсон. Энэ хугацаанд бид Кино урлагийн хууль болон Соёлын бүтээлч үйлдвэрлэлийн хуульд нэмэлт өөрчлөлтүүдийг оруулсан. Ингэснээр гадаадын киноноос тодорхой хэмжээний хувийг Кино урлагийг дэмжих сан руу оруулах, кино урлагийн салбарт хөрөнгө оруулалт хийсэн компаниудад татварын хөнгөлөлт үзүүлэх боломжтой болсон нь уран бүтээлчдэд давуу тал болсон. Мэдээж хэрэг 2022 оноос сургалт семинар, хурал зөвлөгөөнийг олон удаа зохион байгууллаа. Ер нь Кино урлагийн зөвлөл стратеги төлөвлөгөөгөө 2024-2028 онд гаргасан байгаа.

Тэр дагуу хууль журмын дагуу ажиллана. Цаашид Хөшигтийн хөндийд кино цогцолбор байгуулж, Монгол кино үйлдвэр орчмыг аялал жуулчлалын бүс болгохоор төлөвлөсөн" гэсэн юм.

Тэрбээр "Баавгай болохсон" уран сайхны киног сонгон шалгаруулалтаас хассан талаар тайлбарлахдаа "Кино урлагийн зөвлөл нь Оскарын академиас Монгол Улсыг төлөөлөн оролцох уран сайхны киног сонгон шалгаруулдаг эрх бүхий байгууллага. Бид гурав дахь удаагаа энэ сонгон шалгаруулалтыг хийж байна. Энэ жилийн хувьд найруулагч Ж.Сэнгэдоржийн "Чимээгүй хот", нөгөөх нь найруулагч П.Золжаргалын "Баавгай болохсон" кино оролцсон. Манай зөвлөлийн гишүүн Т.Номуунзулын "Чимээгүй хот" уран сайхны киноны продюсер учраас сонгон шалгаруулалтаас хассан бол "Баавгай болохсон" кино долоон хүний санал авсан учраас тэнцээгүй. Бид дахин хүсэлт явуулахаар 10-11 гишүүн багаараа цугларч, дахин сонгон шалгаруулалтыг хийж, санал хураасан.  Ганц хүний шийдвэр бус. Олонхын шийдвэрээ дагаж, шийдсэн" гэдгийг онцлов.