Ховд аймагт ачааны автомашин замын хажуу руу унасан ноцтой осол гарчээ. Тодруулбал өчигдөр /2024.11.13/ өдөр 16:00 цагийн орчимд дээрх осол гарсан байна.

Осол гарсан газар Ховд аймгийн Зэрэг сум буюу аймгийн төвөөс баруун урд зүгт 147 км-т, сумын төвөөс баруун урд зүгт 2 км-т байрлах Эрэг хэмээх газар аж.

Онцгой байдлын ерөнхий газраас тодруулснаар ачааны автомашин замын хажуу унаснаар, жолооч нь хавчуулагдаж, гэмтжээ. Улмаар тус аймгийн Онцгой байдлын газрын Зэрэг сум дахь Гал түймэр унтраах, аврах 70 дугаар ангийн алба хаагчид ажилласнаар иргэн Э “Scania” загварын автомашиныхаа төмөр хийцэд хавчуулагдсан байсныг  эсэн мэнд гаргасан байна.

Түүнчлэн Завхан аймгийн Алдархаан суманд суудлын автомашин цасанд суусан осол гарчээ. Тус аймгийн Онцгой байдлын газрын эрэн хайх, аврах бүлгийн  алба хаагчдыг очиход Баянхонгор аймгаас Завхан аймгийн Улиастай сумын чиглэлд хоёр зорчигчтой зорчиж явсан иргэний  “Алпард” загварын суудлын автомашин цасанд суусан байсныг татан гаргасан байна.

Булган, Завхан, Сэлэнгэ, Хөвсгөл аймагт өчигдөр цас оржээ. Иймд тухайн чиглэлд замд гарахдаа анхаарал болгоомжтой зорчихыг анхааруулж байна.