Амьдралын буруу хэв маягаас үүдэлтэй таргалалт, өвчлөл дэлхий дахинд асуудал болсон. Хятадад ч ялгаагүй. Тиймээс тус улсын эрдэмтэд иргэдийг бүс нутгийнхаа онцлогт тохирсон хоолны дэглэм баримтлахыг зөвлөж байна.

Хятад улс таргалалтын оношлогоо, эмчилгээг стандартчилах анхны удирдамжаа өнгөрсөн сард нийтэлсэн. Статистик дүн харвал Хятадын насанд хүрэгчдийн талаас илүү хувь нь илүүдэл жинтэй байгаа аж. Цаашид ч энэ тоо өсөх хандлагатай байна. Таргалалтаас урьдчилсан сэргийлэх, эмчлэхэд эрүүл хооллолт чухал ач холбогдолтой гэж тус улсын засгийн газар мэдэгджээ.

Гуандун мужийн Сун Ятсений их сургуулийн Нийгмийн эрүүл мэндийн сургуулийн эрдэмтэд долоо хоногийн өдөр өдөрт тааруулан зохиосон эрүүл хоолны дэглэмтэй байхыг уриалж байна. Мөн сүүн бүтээгдэхүүн, улаан махны хэрэглээг багасгахыг дэмжиж байна.

Бүс нутгаар нь авч үзвэл Хятадын хойд нутгийн ард иргэд сүү, сүүн бүтээгдэхүүн хэрэглэдэг боловч хүнсний ногоо бага хэрэглэдэг аж. Тиймээс тус бүс нутгаар жимс, үр тарианы хэрэглээг нэмэгдүүлэх шаардлагатай гэж эрдэмтэд зөвлөжээ. Харин баруун өмнөд бүс нутгаар хатуу ширүүн уур амьсгалтай, усны хомсдолтой бөгөөд иргэд нь улаан махыг ихээр хэрэглэдэг. Энэ бүс нутагт буурцагт ургамал, хүнсний ногооны хэрэглээг нэмэгдүүлэх шаардлагатай гэв. Тэгвэл тус улсын зүүн хэсгийн ард иргэд үр тариа, далайн хоол, хүнсний ногоог түлхүү хэрэглэх хэрэгтэй байна.