Дональд Трамп дахин ерөнхийлөгчөөр сонгогдсон тул дэлхийн улс орнууд АНУ-ын шинэ удирдагчид тохирсон стратегийг дор бүрнээ боловсруулж буй нь дамжиггүй. Тэр дундаа Өмнөд Солонгосын ерөнхийлөгчийн арга барил анхаарал татаж байна. Тус улсын Ерөнхийлөгчийн тамгын газраас саяхан мэдэгдсэнээр Юн Сук Ёл "Гольфтой дипломат ажилллагаа"-нд бэлтгэн гольфоор хичээллэж эхэлжээ. Эргэн тойрных нь хүмүүс Юн Сук Ёлд ийм зөвлөгөө өгсөн аж. Тэрбээр найман жилийн дараа анх удаа гольфоор хичээллэж буй нь энэ юм.

Гольф бол Трампад хүрэх найдвартай зам гэдэг нь аль эртнээс батлагджээ. Цаашилбал, энэ нь түүний бизнесийн гол хөдөлгүүр юм.

"CNN" агентлагийн хийсэн судалгааг харвал Трампийн гольфийн талбайнууд болон үүнтэй холбоотой компаниуд хэдэн зуун сая ам.доллараар хэмжигдэх ашиг олдог. Трамп Цагаан ордонд албан тушаал хашиж байхдаа бусад ерөнхийлөгчөөс илүү олон удаа гольфийн талбайгаар зочилжээ. Мөн Флорида, Нью Жерси, Виржиниа дахь гольфийн талбайнууддаа хууль тогтоогчид болон бизнес эрхлэгчдийг дагуулан ирдэг байв. Японы ерөнхий сайд агсан Шинзо Абэ Трампийн Манхэттэн дэх цамхагт зочлох үеэрээ түүнд алтаар бүрсэн гольфийн бөмбөг бэлэглэж байжээ. Мөн тэд Флорида болон Японд хамт гольф тоглож байсан удаатай.

Өмнөд Солонгос, АНУ-ын харилцаанд гольф онцгой үүрэг гүйцэтгэсэн түүх ч бий. Трамп 2017 онд Өмнөд Солонгост айлчлахдаа "Солонгос гольфчид бол дэлхийн хамгийн шилдэг тоглогчдын нэг. Шилдэг 10 тоглогчийн найм нь солонгос байна. Тэр дундаа хамгийн шилдэг дөрөв нь дөрвүүлээ солонгос байна" гэж хэлж байжээ.