Монголын The MongolZ баг өчигдөр/2024.11.12/ Шанхай хотноо Мэйжор буюу дэлхийн аваргын эрх олгох тэмцээнд оролцож, зорьсондоо хүрлээ. Тэд Alter Ego болон DRILLAS багуудыг дараалан ялж, Мэйжорт өрсөлдөх эрхээ олж авав. Ингэснээр тус баг гурав дахь удаагаа Мэйжорт орохоор болж, дахин өөрсдийн стикерийг гаргахаар болжээ.

"Counter Strike 2" тоглоомын Мэйжор анх удаагаа Азид болно. 1.25 сая ам.долларын шагналын сантай тус тэмцээн арваннэгдүгээр сарын 30-наас арванхоёрдугаар сарын 15-ны өдрүүдэд Шанхай хотноо болох бөгөөд дэлхийн шилдэг 24 баг оролцох учиртай.

Мэйжорт оролцоно гэдэг өөрөө асар их нэр хүндийг дагуулах төдийгүй ард нь том дүнтэй мөнгө эргэлдэнэ. Шагналын сангаас илүүтэйгээр стикерийн орлого баг, тамирчдын сонирхлыг, "шуналыг" хөдөлгөнө.

Стикер гэдэг бол тухайн баг, тамирчдыг Мэйжорт шалгарсанд зориулсан дахин давтагдашгүй гоёо гэж ойлгож болно. Баг, тамирчид өөрсдийн стикерийг урлаж, үүнийгээ тоглоомынхоо галт зэвсэг дээр наадаг билээ.

Мэйжорт шалгарсан баг бүр стикерээ гаргаж, үүнийг нь цахим спорт сонирхогчид худалдан авч, тоглоомынхоо бууг гоёдог. Тамирчдын нэр, багийн логотой стикерийн үнэ харилцан адилгүй. Капсулиас задлаагүй, ашиглаагүй стикер оноосоо хамааран 1.39-23.01 ам.долларын хооронд зарагддаг. Харин задалсан, ашигласан стикерийн үнэ оноосоо хамааран 1 ам.доллараас эхлээд 80 мянган ам.доллар хүрдэг. Одоогоор хамгийн үнэтэй стикерээр 2014 оны Катовицегийн "Titan Holo" тодроод байна. Үүнээс гадна 2014 оны Катовицегийн задлаагүй капсулийн үнэ 18’600 ам.доллар байгаа аж.

СТИКЕР ХЭРХЭН МӨНГӨ БОЛДОГ ВЭ?

Мэйжор эхлэхтэйгээ зэрэгцэн баг, тамирчдын стикер худалдаанд гарна. Ердөө 1 ам.доллараар капсуль нээх бөгөөд тус капсуль дотор аль ч багийн, хэний ч стикер байх боломжтой. Ингээд Мэйжор дууссаны дараа орлогоо нэгтгэж, үүнийгээ баг тамирчдад хуваан олгодог. Мэдээж багуудын амжилтаас шалтгаалан мөнгөн дүн харилцан адилгүй.

Шилдэг баг, алдартай тамирчдын содон стикер хоёр дахь зээл дээр илүү үнэтэй худалдаалагдана.

2019 онд Берлин хотноо болсон Мэйжор тэмцээний дараа "CS" тоглоомыг хөгжүүлэгч "Valve" компанийн зүгээс нийт 11 сая ам.долларыг баг, тамирчдад хуваан олгожээ. Улмаар цар тахлын улмаас түр завсарлаж, Стокгольм, Антверпын Мэйжороор эргэн ирж, 10 жилийн ойгоороо нийт 70 сая ам.долларыг тараасан гэнэ.

Гэхдээ Парисын Мэйжор стикерийн орлого түүхэн дээд амжилтыг тогтоосон түүхтэй. Зөвхөн стикерийн орлого нь 110 сая ам.доллар хүрч, дунджаар 4.5 сая ам.долларыг багуудад хуваарилсан аж. Харин тамирчдад 200-250 мянган ам.доллар очжээ.

• Эхний Challengers шатны багт 2.6 сая ам.доллар, тамирчин бүрт нь 200 мянган ам.доллар
•  Дараагийн Legends шатны багт 3.5 сая ам.доллар, тамирчин бүрт 200 мянган ам.доллар
• Эцсийн Champions шатны багт 4.5 сая ам.доллар, тамирчин бүрт 250 мянган ам.доллар

Парисын Мэйжорын стикерийг нийт 106 өдөр борлуулжээ. Өөрөөр хэлбэл, 110 сая ам.долларыг 106 өдөрт олсон гэсэн үг.

Энэ жилийн стикерийн орлого Парисын Мэйжорыг давж магадгүй гэх тооцоо бий. Учир нь Шанхай хотноо болно. Хятадууд бол "CS"-ийн гол хэрэглэгчид, тоглогчид. Мөн эзэн орны хоёр ч баг оролцох боломжтой. Тэгэхээр Хятадын багууд Мэйжорт оролцвол, тэднийг дагаад дэмжигчид нь капсуль задалж, багийнхаа стикер авахын түүс болно. 2024 оны эхний Мэйжор болох Копенхагенд оролцсон Хятадын "LVG" багийн тамирчин z4KR-ийн алтан стикер 2024 оны хамгийн үнэтэй стикерээр тодорсон. Түүний гарын үсэг бүхий стикер 128 ам.доллар хүрсэн гэнэ.

The MongolZ баг гурав дахь стикерээ гаргасан. Тэднээс өмнө анх Монголын IHC Esports баг хоёр стикер гаргаж, түүх бүтээж байв. Тамирчдаас bLitz, Techno4k хоёр тав дахь стикерээ гаргалаа. Тэд хоёулаа IHC Esports болон The MongolZ багуудад хүчин зүтгэсэн мөн зүтгэж буй. Багийнхаа ганц стикерийг гаргах гэж тамирчид, эзэд, арын албаныхан маш их зүйлсийг зориулж, золиосолдог. Хэрэв Мэйжорт шалгарвал санхүүгийн хувьд таатай боломжууд гарч ирдэг.