Н.Учрал

ЗГХЭГ-ын дарга

-Би өнөөдөр Засгийн газрын Олон нийттэй харилцах 11-11 төв дээр ажиллалаа. Олон асуудал овоорсон байна. Тэр дотроо эмээсээ жор нь илүү чухал болсон асуудал иргэдийн дунд тулгамдсан асуудал болж хувирлаа. Өвчин зовлонтой хүнд цаг явж өгдөггүйг би өөрөө сайн мэднэ. 24 цагийн эмийн сан байлаа ч гэсэн 24 цагийн жор гэж алга. Нэг ёсондоо өвдөөд зовоод ирсэн хүнээс жор нэхдэг, жорыг нь заавал цаасаар шаарддаг энэ байдлыг зогсоогооч ээ гэдгийг иргэд хүсч байна.

Би өнгөрсөн хугацаанд Цахим хөгжлийн сайдаар ажиллаж байхдаа төр, хувийн, өрхийн гээд бүхий л эмнэлгүүдийг мэдээлэл солилцох боломжоор хангах ажлыг хийсний үндсэн дээр гар утсан дээр "И-Монголиа"-д бүх эмийн жор, өвчний түүхүүд бүгд орсон байдаг.

Гэсэн хэдий ч яагаад өнөөдөр эмийн санд ажиллаж байгаа хүмүүс иргэдээс цахим биш цаасан жор нэхээд байгаа юм бэ гэдэг асуулт гарсаар байна. Тийм ч учраас энэ асуудлын мөрөөр Даваа гаригийн 10.00 цагт Эрүүл мэндийн сайд Т.Мөнхсайханыг 11-11 төв дээр ажиллуулна.

Ирэх долоо хоногийн Засгийн газрын хуралдаанаар Эм, эмнэлгийн хэрэгслийн тухай хуульд заасан заавал цаасаар жор бичих биш бидний бэлтгэсэн, хэрэгжүүлж байсан цахимаар шууд жор бичих буюу эмчлэх эрхтэй, жор бичих эрхтэй бүх эмч нар гар утсаа гаргаад иргэдэд жор бичих бололцоог хангах системийг хэрэгжиж эхлэх үүрэг даалгавар өгнө. Энэ асуудлыг шийдвэрлэнэ. 

Т.Мөнхсайхан

Эрүүл мэндийн сайд

-Нэг хүн өрхийн эмнэлэг дээрээ эмээ бичүүлж, кодоо авна. Тэгээд аль ч эмийн сан дээр очоод тэр кодоо хэлэхэд авах ёстой эмүүд нь жагсаалтаараа гараад ирнэ гэсэн үг. Жишээлбэл, даралтны эмийг жоргүй олгох хуучин систем рүүгээ орохоор уудаг даралтны эм нь үйлчлэхээ больж, тэр эмээ уусаар байгаад харвалт өгч, амь нас нь эрсдэх тохиолдол асар их байна. Тухайн эмээ удаан хугацаанд уухаар даралт нь хэт бууж, эргээд зүрх судасны систем өөрчлөлтөд ордог. Энэ бүх эрсдэлээс сэргийлж байна гэж ойлгох хэрэгтэй. Даралтны эм нь тохирч, удаан хугацаанд тогтмол ууж байгаа хүн нь цөөн байгаа. Тэрийгээ маш сайн ойлгож, сэргийлэх ёстой.

Эмийн сангуудтай хамтран ажиллаж байгаа. Зарим эмийн сан ямар нэгэн цахим программ хангамжгүй, ашиглахгүй байна. Эрүүл мэндийн байгууллагууд бүгд цахим системд холбогдсон.

Зарим нэг жижиг эмнэлэг цахим программ хангамжгүй учраас эмээ цахимаар бичиж чадахгүй байгаа. Цахим систем ашиглаж байгаа эмнэлгүүд жижиг жорын цонхтой байдаг. Хуучин хөнгөлөлттэй эмийг 1500 эмийн сангаар цахим систем ашиглан авдаг л байсан. Би ажлаа авсан цагаас хойш эмийг бүх эмийн сан, эмнэлгээр авдаг болсон тогтолцоог бий болгож байна. Үр дүн нь эхнээсээ гарч буй. Өрхийн эмнэлэг дээр ирж буй 10 хүний тав нь эмээ жороор бичүүлж байна. Эргээд хүмүүс эмчдээ үзүүлж байж эмийн жороо бичүүлж, зөв тунгаар авах шаардлагатай гэдгээ мэддэг болсон байна.

Эрүүл мэндийн боловсролыг сайжруулах тал дээр арга хэмжээ авах ёстой. Цахимаар жороо бичвэл бүх төрлийн эмээ аль ч эмийн сангаас худалдаж авах боломжийг бүрдүүлэх хэрэгтэй. Ингэж байж бид буруу тогтолцоогоо засч залруулж чадна. 

Эмчдээ үзүүлээд эмээ авч уух нь зөв. Иргэд яаралтай 24 цагийн турш цахимаар эмээ бичүүлж авна гэсэн ойлголт байхгүй. Хэрвээ хүн яаралтай эмчид үзүүлэх шаардлагатай бол улсын хэмжээнд яаралтай тусламж үйлчилгээний тогтолцоо ажиллаж байгаа. Тэнд очиж бичүүлж, эмээ авна. Тэгэхгүй бол 24 цагийн турш эмч нар руу утсаар ярьж, цахимаар холбогдож эмийн жороо аваад байвал жор бичсэний хэрэг гарахгүй. Эмч хүнээ үзээд тухайн хүнд ямар эм таарах вэ гэдгийг оношилж байж жороо бичих ёстой.