Шинэ Зеландын ерөнхий сайд Кристофер Луксон Мягмар гаригт 200 мянга гаруй хүүхэд, насанд хүрэгчдээс уучлалт хүслээ. Тодруулбал, 1950-аад оны үед төрөөс санхүүжүүлдэг байсан асрамжийн газарт бие, сэтгэлийн хүчирхийлэл амсаж, эрүү шүүлттэй нүүр тулгарсан хохирогчид болох нутгийн уугуул Маоричуудаас уучлалт гуйсан юм. Өнгөрсөн долдугаар сард эдгээр асрамжийн төвүүд асран хамгаалж буй Маори хүүхдүүддээ хэрхэн ханддаг, ямар нөхцөл байдалд амьдруулж байсныг нь нотолсон тайлан гарсан.

Үүнд дурдсанаар, 1950-иад оноос хойш асрамжийн газарт хүчээр илгээгдсэн 655 мянган хүүхэд байсан бөгөөд тэдэнд сургагч багш нар бэлгийн хүчирхийлэл үйлддэг байсан нь тогтоогдсон.

Мөн сэтгэл санааны дарамт, бие махбодын зодуурыг тэвчихийг шаардаж, эрүүл хүнсээр хооллолгүй өлсгөж тамалдаг байсан аж. Одоогийн байдлаар, эдгээр 650 мянган хохирогчдын талаас илүү хувь нь асрамжийн төвд байхдаа амиа алдсан бөгөөд 200 мянга гаруй хүн л амьд үлдсэн гэх тооцоо бий. Мөн амьд үлдэж, асрамжийн төвөөс гарсан хүмүүсийн зарим нь сэтгэл, бие махбодын гэмтлээ дийлэлгүй, хууль бус гэмт хэрэгт оролцсон эсвэл амиа хорлосон гэж тайланд бичжээ.

Ерөнхий сайд Луксон парламентын танхимд амьд үлдсэн хохирогчид , тэдний гэр бүл, нас барсан хохирогчдын гэр бүлийг урьж, орон даяар албан ёсны уучлалт гуйсан юм.

Тэрбээр "Өнөөдөр би энэ засгийн газар төдийгүй өмнөх засгийн газруудыг төлөөлж, төрийн болон шашны санхүүжилттэй асрамжийн төвд хохирсон бүх хүнээс уучлалт хүсч байна. Энэ/асрамжийн төвүүд/ бол үнэхээр аймшигтай, зүрх эмтрэм, буруу зүйл байсан. Бас хэзээ ч бий болохгүй байх ёстой байв. Хэзээ ч Шинэ Зеландад ийм харгис хүчирхийлэл байгаагүй гэж боддог байлаа. Гэхдээ бодит үнэнийг та бүхэн л мэдэж байсан. Үнэнийг сонсож, итгүүлэхийг олон жил та бүхэн хичээж, хүлээж байсан. Одоо Шинэ Зеланд бүгдийг мэдэж авлаа. Өмнө нь бид энэ аймшигтай түүхийг үл тоож, хараагүй, сонсоогүй мэт байдаг байсан бол одоо бүгдийг мэдэж авсан. Бид зөв зүйлийг хийх ёстой гэдгээ мэдэж авлаа. Нэгдүгээр, та бүхэнд хэрэгтэй байгаа тусламжийг үзүүлэхээ амлаж байна. Хоёрдугаарт, ирээдүйд ийм хүчирхийллийг дахин бий болгохгүйн тулд чадах бүхнээ хийх болно" гэжээ.

Парламентын танхимд уригдсан Тупуа Урлич таван настай байхдаа асрамжийн төвд хүчээр очжээ. Түүний аав, нагац ах нар гээд гэр бүлийн гишүүд нь бүгд эдгээр асрамжийн төвд амьдардаг байв. Тупуа Урлич асрамжийн төвд байхад аав, нагац ах нар нь амиа хорлосон аж. Учир нь бага насандаа мэдэрсэн бие, сэтгэлийн шарх нь жил ирэх тусам дийлдэшгүй болсноор хорвоог орхих шийдвэр гаргасан байна. Тупуа Урлич анх асрамжийн төвд очсон өдрөө сайн санадаг бөгөөд багш, асран хамгаалагч нар нь хэрхэн зовоодог байсныг "Guardian"-д ярьсан. Тэрбээр парламентын танхимд ерөнхий сайдын уучлалт гуйж буйг сонсож байхдаа уйлж байсан юм.

Тус арга хэмжээнд үг хэлэхээр сонгогдсон амьд үлдсэн гурван хохирогч бүгд асрамжийн тогтолцоонд яаралтай өөрчлөлт хийж, хохирлыг барагдуулахыг хүсч буйгаа илэрхийлсэн.

Тэдний нэг Кейт Виффин хэлэхдээ "Өнөөдөр бол маш чухал, түүхэнд үлдэх өдөр боллоо. Бид бүгдийн олон жил туулсан зовлонг ойлгож, туслалцаа үзүүлнэ гэдэгт найдаж байна" гэв. Мөн 11 настайдаа төрийн асрамжид байсан, бэлгийн хүчирхийлэл, сэтгэл зүйн хүчирхийлэлд өртсөн Уиффин Луксон, Хипкинс нар "Бид олон жил чимээгүй шаналж, орхиод явсан гэр бүлийнхээ зовлонг үр хойчдоо өвлүүлэхгүй гэж боддог байсан. Одоо , бидэнд тусламж үзүүлэхээ амласан тул үүндээ үнэнч байж, ирээдүйн мянга мянган хүүхдүүдийг гэрэлтэй ирээдүй угтана гэж найдаж байна" гэсэн юм.