Кубын зүүн эргийн ойролцоо Ням гаригт 6.8 баллын хүчтэй газар хөдлөлт болж, арал бүхэлдээ тог, цахилгаангүй болсон байна. Өнгөрсөн долоо хоногт тус арал хоёр удаа хар салхины дайрлагад өртөж, их хэмжээний хохирол амссан байжээ. Гэвч газар хөдлөлтийн улмаас хохирлын хэмжээ нэмэгдэж, арлын ихэнх иргэд орон гэргүй болсон байна. АНУ-ын Геологийн албаны мэдээлснээр, газар хөдлөлтийн голомт нь Бартоломе Масо хотоос өмнө зүгт 39 километрийн зайд байсан. Ерөнхийлөгч Мигель Диаз-Канел өнөөдөр мэдэгдэл хийж "Хөрсний нуранги үүссэний улмаас орон байр эвдэрч, нурсан. Мөн цахилгааны шугамд гэмтэл учирсан. Тиймээс мэргэжлийн байгууллага томилж, хохирлыг барагдуулахаар ажиллаж байна" гэв.

Кубын Үндэсний газар хөдлөлт судлалын албаны дарга Энрике Диего Аранго Ариас нөхцөл байдлын талаар "CNN"-д мэдээлэв. Тэрбээр "Энд цахилгаан тасарсны улмаас холбооны бүх хэрэгсэл ажиллахгүй болсон. Гадагшаа мэдээлэл хүргэх боломжгүй байсан. Нөхцөл байдал маш төвөгтэй байна. Өмнө нь хүчтэй газар хөдөлдөг байсан ч энэ удаагийн шиг байгаагүй" гэсэн юм. Өнгөрсөн сард Оскар хар салхины улмаас эд материалыг хохирол амсаад удаагүй байсан зүүн зүгийн Сантьяго-де-Куба, Ольгин, Гуантанамо мужуудад газар хөдлөлтийн чичиргээ мэдрэгджээ.  Хэдийгээр цунами үүсээгүй ч дахин газар хөдлөлт болох бол үүсэх эрсдэлтэй байгааг АНУ-ын Үндэсний цунамигаас сэрэмжлүүлэх төв мэдэгдсэн байна.