Монголын сагсан бөмбөгийн дээд лиг шигшээ багийн тоглолттой холбогдуулан завсарласан. Энэ хугацаанд багууд улирлын эхлэлээ дүгнэж, шинэчлэлтүүдийг хийж байна. Легионер тамирчид хөдөлгөөнд орж, монгол дасгалжуулагчид ажлаа өглөө.

BCH KNIGHTS ШИНЭ ДАСГАЛЖУУЛАГЧДАА ТАНИЛЦУУЛАВ

Улирлыг тааруу эхлүүлсэн учраа олсон Knights баг шинэ дасгалжуулагчдаа танилцууллаа. Тэдний ахлах дасгалжуулагчаар Жон Пөрвс томилогдсон аж. Түүний хувьд NBA болон NCAA-н 1-р дивизонд туслах дасгалжуулагч, видео аналист байсан бөгөөд Филиппин, Индонези болон Вьетнам улсуудын мэргэжлийн лигт ахлах дасгалжуулагчаар, Вьетнамын шигшээ багийн ахлах дасгалжуулагч зэргээр амжилттай ажилласан туршлагатай дасгалжуулагч гэнэ.

Түүний дасгалжуулагчдын багт серби мэргэжилтэн Петар Шешлия ажиллана. Тэрбээр 2013 оноос эхлэн Серби, Грек болон Унгар улсуудын өсвөрийн шигшээ багууд болон мэргэжлийн лигүүдэд ахлах болон туслах дасгалжуулагчаар ажиллаж байсан төдийгүй сагсан бөмбөгийн спортын шинжлэх ухааны өгүүллүүд хэвлүүлсэн судлаач мэргэжилтэн аж.

Тус багийн хуучин ахлах дасгалжуулагч Ц.Эрдэнэбаясгалан багтаа үлдэж, туслах дасгалжуулагчаар ажиллана.

МЕТАЛЛЫН АХЛАХ ДАСГАЛЖУУЛАГЧ АЖЛАА ӨГЧЭЭ

Бишрэлт Металл багийнхаа ахлах дасгалжуулагчийн албанд эргэн ирсэн Б.Ганхөлөг ажлаа өгч буйгаа зарлав. Түүний хувьд хоёр улирлын өмнө багийнхаа ахлах дасгалжуулагч байсан ч өнгөрсөн улирал ажлаа гадаад мэргэжилтэнд өгч, өөрөө туслах дасгалжуулагчийн албанд шилжсэн. Харин энэ улирал эргэн хуучин ажилдаа ороод байсан юм. Гэвч удаан үргэлжилсэнгүй.

Б.Ганхөлөг Монголын шигшээ багийг удирдан Ханжоугийн Азийн наадамд оролцож байсан билээ.

Түүний халааг гадаад мэргэжилтэн авах уу, эсвэл туслах нь болох Б.Тамжид үргэлжлүүлэх үү гэдэг сонирхолтой байна.

ЗАВХАН BROTHERS БЭРТСЭН ТАМИРЧНАА ХАССАН УУ?

Гавьяат дасгалжуулагч О.Баярцогт өчигдөр/2024.11.11/ өөрийн цахим хуудаснаа дараах зүйлсийг бичив. Тэрбээр "Бэртсэн тамирчнаа багаасаах асдаг жишиг спорт байж боломжгүй үйлдэл" гэв. Энэ мэдээ цахим орчинд шуугиан тарив. Аль баг, хэнийг хассан бэ гэх таавар сагсан бөмбөг сонирхогчдын дунд өрнөсөн. Улмаар Завхан Brothers баг саяхан гэмтсэн С.Мөнхбаатарыг хассан байх гэх шуум гарчээ. Учир нь С.Мөнхбаатарын хувьд О.Баярцогтын гарын шавь нарыг нэг билээ. Шавиа өмөөрсөн мэдэгдлийг гэх хүн олон байсан. Тэгвэл эх сурвалжуудын мэдээлж буйгаар С.Мөнхбаатарыг баг нь хасаагүй аж. Ямартай ч удахгүй тодорхой мэдээллүүд ил болох биз.

КАЙРИ УОКЕР, ЖЕАНТАЛ СИЛЛА НАР ЭРГЭН ИРЛЭЭ

Багууд улирлын эхний завсарлагаанаар бүрэлдэхүүндээ өөрчлөлт оруулж байна. Эдгээр дундаас хамгийн сонирхолтой шилжилт нь Кайри Уокер SG Apes багт эргэн нэгджээ. Мөн Стефен Хөртийг нутаг буцаасан аж. Уг нь тэрбээр будагтай талбайд тун давгүй тоглолтыг үзүүлж байсан ч Apes-ийн дасгалжуулагч, удирдлагуудад таалагдаагүй бололтой. Россын хувьд багтаа үлдсэн.

Тэгвэл Сэлэнгэ Бодонс улам хүчирхэгжиж, Жеантал Силлаг Монголд авчирлаа. Түүний хувьд өнгөрсөн улирал Бишрэлт Металлын бүрэлдэхүүнд багтаж, финалд хүрээд зогсохгүй Азийн аваргуудын лигийн урьдчилсан шатанд тун сайн тоглосон билээ.