НЭМЭЛТ:

Монголын The MongolZ баг гурав дахь удаагаа Мэйжорт шалгарлаа. Тэд дөнгөж сая DRILLAS багийг 2-1 гэсэн харьцаатай хожив. Азид анх удаагаа болох CS2-ийн Мэйжор буюу дэлхийн аварга энэ арваннэгдүгээр сарын 30-ны өдөр эхэлнэ. Нийт шагналын 1.25 сая ам.доллар.

Techno4k болон bLitz нар тав дахь удаагаа стикерээ гаргаж байна. Тэд өмнө нь IHC Esports багийн бүрэлдэхүүнд хоёр удаа стикерээ гаргасан билээ. Харин 910, Senzu, Mzinho нар хоёр дахь удаагаа стикерээ гаргав.

Ази, Номхон далайн бүс нутгаас нийт гурван баг Мэйжорт өрсөлдөнө.

Тоглолтын дараа М.Содбаяр "Үнэндээ бид энэ удаагийн Мэйжорт түрүүлж магадгүй юм. CS2-ийн хоёр дахь Мэйжортоо шалгарч байна. Азийн бүсийн Мэйжортоо шалгарсандаа баяртай байна. Гэртэйгээ ойрхон тоглох болно. Бид нарыг дэмжээрэй" гэв.

Мэйжорын эрх олгох Ази, Номхон далайн бүс нутгийн тэмцээн өчигдөр/2024.11.11/ Шанхай хотноо эхэлсэн. Тус тэмцээнд энэхүү бүс нутгийн шилдэг найман баг өрсөлдөж байгаа бөгөөд ердөө гурав нь эрхээ авах юм. Тэмцээний эхний өдөр тааварлаагүй үр дүнтэй тоглолтууд боллоо.

The MongolZ 13 – 8 Alter Ego

Азийн тэргүүн баг Монголын The MongolZ баг эхний тоглолтоо бүрэлдээд удаагүй байгаа Alter Ego багийн эсрэг хийлээ. Индонезид харьяалалтай ч олон улсын тамирчдаас бүрдсэн Alter Ego-д Монголын шилдгүүдийн нэг "dobu" орлон тоглогчоор тоглож байгаа. Тоглолт Ancient дээр болж, тоглолтын эхнээс The MongolZ илүүрхэж явсаар эхний ялалтаа авчээ.

DRILLAS 13 – 11 Lynn Vision Gaming

Энэ удаагийн RMR-ийг тун сонирхолтой болгосон тоглолт. Алдарт стриймер ohnePixel-ийн байгуулсан "DRILLAS" баг Хятадын тэргүүн баг LVG-ийг ялж, шуугиан тарилаа. Хэн ч LVG-ийг эхний тоглолтдоо хожигдоно гэж бодоогүй биз. Нутаг дээрээ барьц алдав.

Rare Atom 13 – 4 GR Gaming

Онлайн тэмцээн дээр "алаад" байдаг Оросын GR Gaming багийн тар нь танигдах шиг. Rare Atom-ийн эсрэг юу ч хийж чадсангүй.

TALON 13 – 9 FlyQuest 

Хоёр австрали багийн тулаанд TALON нь илүүрхэв. Уг нь FlyQuest чансаа өндөр, сүүлий үеийн форм тун сайн байсан юм сан. Учрыг нь олж чадсангүй.

Өнөөдөр Мэйжорын эрх авсан эхний хоёр багийн нэр тодорно. Мөн гэр рүүгээ хоосон буцах хоёр баг тодрох учиртай.

Хожигдсон нь хасагдах тоглолтууд:

• Alter Ego – Lynn Vision Gaming
• GR Gaming – FlyQuest

Хожсон нь Мэйжорын эрх авах тоглолтууд:

• The MongolZ – DRILLAS
• Rare Atom – TALON