Саяхан Valve-ийн чансаагаар дэлхийн чансааны тавдугаарт бичигдэж эхэлсэн The MongolZ өчигдрөөс эхлэн /2024.11.11/ HLTV-ийн чансаагаар дэлхийд есдүгээрт бичигдэж эхлэв. Ингэснээр тус баг HLTV-ийн түүхэнд хамгийн өндөр чансаанд хүрсэн Азийн баг боллоо. Өмнө нь ямар ч Ази баг HLTV-ийн чансааны есдүгээрт байтугай топ 10 дотор ч бичигдэж байсангүй. Тэд өмнөх чансаагаар дэлхийн чансааны 11 дүгээрт бичигдэж байсан. Улмаар хоёр байр ахижээ.

The MongolZ Азидаа HLTV-ийн чансаагаар тасархай тэргүүлж байна. Тэдэнтэй зэрэгцэх байтугай дөхөж очих баг алга. Азийн бусад багуудын HLTV-ийн оноог нийлүүлсэн ч The MongolZ-той тэнцэхгүй.

Шинэчлэгдсэн чансаагаар The MongolZ-ийн адилаар Astralis ч байр ахиж, дэлхийн чансааны аравдугаарт бичигдэж эхлэв. Харин Бразилын FURIA, Оросын Virtus.pro нар байр ухарч, дэлхийн чансааны топ 10 байраас гарчээ.

The MongolZ сүүлд Thunderpick Championship тэмцээнд түрүүлсэн амжилтаараа байр ахиж чадлаа.

HLTV-ийн чансааны эхний найман байрт өөрчлөлт орсонгүй. Украины Natus Vincere чансааг тэргүүлж, Германы G2, Францын Vitality, Оросын Spirit, Германы MOUZ тэргүүтэй удаалж байна.

Монголын бусад багуудын тухайд ATOX баг 33 байр ухарч, 76 дугаарт бичигдэж эхлэв. Тэдний сүүлийн үеийн амжилт, бүрэлдэхүүний тогтвортой байдал зэрэг энэ тааруу үзүүлэлтэд нөлөөлсөн. Харин IHC Esports баг таван байр ахиж, 99 дүгээрт, The Huns 22 байр ахиж, 147 дугаарт тус тус бичигдэж байна.