Цахим спортын "Counter Strike" төрлийн дэлхийн аварга гэж хэлж болохуйц Мэйжор тэмцээн энэ жил Шанхайд болно. Үүнтэй холбогдуулан тус тэмцээнд оролцох эрхийн төлөөх тэмцээнүүд өнөөдөр/2024.11.11/ Ази, Номхон далайн бүс нутгаас эхэлж байна. Нийт найман шилдэг багаас гурав нь Мэйжорт оролцох болно. Монголоос энэ жил ганцхан "The MongolZ" баг өрсөлдөнө. Тэдний эхний тоглолт өнөөдөр 16.00 цагаас Индонезийн "Alter Ego" багийн эсрэг. Тус багт монгол тамирчин "dobu" буюу Б.Ган-Эрдэнэ орлон тоглогчоор тоглоно.

Дээрх хоёр багаас гадна Австралийн "FlyQuest", "Talon", Хятадын "Rare Atom", "Lynn Vision Gaming", ойрхи дорнодын "DRILLAS", Хонк Конгийн "GR Gaming" багууд өрсөлдөнө.

Та бүхэндээ хуваарийг танилцуулъя.

2024.11.11-НИЙ ӨДӨР

• 16.00 цагт: The MongolZ vs Alter Ego
• 17.00 цагт: DRILLAS vs Lynn Vision Gaming
• 18.00 цагт: Rare Atom vs GR Gaming
• 19.00 цагт: TALON vs FlyQuest

Өмнө нь Ази, Номхон далайн бүс нутгаас хоёрхон баг Мэйжорт өрсөлддөг байсан бол The MongolZ-ийн олон улсад үзүүлж буй сайн амжилтын ачаар энэ бүс нутагт дахин нэг эрх нэмэгдсэн билээ. Олны анхааралд өртөх нь бага, орхигдоод байсан Ази, Номхон далайн "CS" сүүлийн үед "The MongolZ"-ийн ачаар хүртэх ёстой зүйлээ хүртэж, Европ, Америкийн багуудтай өрсөлдөж чадна гэдгээ харуулж буй.

"FlyQuest" багийн дасгалжуулагч нь Монголын анхны стикертэй тоглогч "erkaSt" буюу Г.Эрдэнэцогт юм. Түүний гаргасан жим, гэтэлсэн замаар монголчууд Мэйжорт ойрхон гэдгээ мэдэрч, удалгүй монгол баг стикерээ гаргасан түүхтэй.