Аргентины хөл бөмбөгийн танхай бүлэглэлийн толгойлогч Андрес Бракамонте буудуулж амиа алджээ. Түүний цогцсыг Росарио дахь клубийнх нь цэнгэлдэх хүрээлэнгийн ойролцоо олсон байна. Пилин гэх хочтой Андрес Бракамонте бол Росарио Сентрал дэмжигчдийн бүлэглэлийн толгойлогчоор 20 гаруй жил ажилласан. Тэрээр өрсөлдөгч багуудтай ширүүн тэмцэлддэгээрээ алдаршиж, танхайн бүлэглэлийн толгойлогч гэгдэх болжээ. Өнгөрсөн Бямба гаригт Андрес, орлогч Даниел "Рана"-тайгаа хамт Гиганте де Арройто цэнгэлдэхээс дөрөвхөн гудамжны зайд явж байхад нь мотоцикль унасан үл таних хүн тэднийг буудаж, хороосон байна.  Хэрэг гарахаас өмнө Росарио Сентрал баг лигийн тоглолтод оролцож байсан аж.

Андресын хувьд мөнгө угаасан, дээрэм хийсэн хэрэгт шалгагдаж байсан тул Аргентины эрх баригчид тоглолтод оролцохыг нь хориглосон байжээ. Тодруулбал, Лос Монос гэгддэг хар тамхины бүлэглэлтэй түүнийг холбоотой, үүгээр дамжуулж мөнгө угаадаг гэж буруутгаж байсан юм.

Андрес, Даниел нарыг орон нутгийн Сентенарио эмнэлэгт хүргэсэн ч эмч нар хэргийн газар дээр нас барсан гэж дүгнэсэн. Андресын амийг хөнөөсөн тухай орон нутгийн хэвлэл мэдээллээр цацаж, "тэмцээний онооны зөрүүнээс" болж буудсан байж болзошгүй гэж мэдээлсэн байна. Мөн олон жил гэмт хэрэг үйлдсэн Андрес байнга халдлагад өртдөг байсныг нь онцолсон аж. Хамгийн сүүлд, өнгөрсөн наймдугаар сард Андрес хамтрагчтайгаа уулзаж байхад нь үл таних хүн түүнийг буудсан. Сум түүний ар нуруунд нь туссан ч аминд нь халтай байгаагүй юм.