Монголын цахим спортын тамирчид тамирчин олон улсын томоохон багуудын хараанд өртөж, дэлхийн шилдгүүдтэй мөр зэрэгцэн тоглох цаг иржээ. Энэ удаад dota2-ийн мэргэжлийн тамирчид болох 423 болон seimei нар алдарт "Secret" багтай нэгдэв. Тус баг өчигдөр/2024.11.10/ шинэчилсэн бүрэлдэхүүнээ албан ёсоор зарласан бөгөөд 423, seimei нараас гадна Kyzko, Ainkrad гэх Беларусь, Оросын тамирчдыг элсүүлсэн аж.

Сүүлийн жилүүдэд тааруухан амжилт үзүүлж, томоохон тэмцээний түрүү хүртэж чадахгүй яваа "Puppey"-ийн "Secret" баг эргэн формдоо орохыг хичээж байна. Тэд хамгийн сүүлд 2022 оны The International-ийн финалд хүрснээс хойш нэгдүгээр зэрэглэлийн тэмцээнд гавьтай амжилт үзүүлсэнгүй. Угтаа тус баг Шанхай, Парис тэргүүтэй Мэйжоруудад түрүүлж, 2019 онд The International буюу дэлхийн аваргын гуравдугаар байр, 2022 онд хоёрдугаар байр эзэлсэн амжилттай.

Мэдээж "Secret" багийг "Puppey" буюу Клемент Ивановгүй төсөөлөшгүй. Өдгөө 34 настайт тэрбээр 2014 онд энэ багт элссэнээс хойш бүтэн арван жил тогтвортой тоглож, одоо багийн удирдлагуудын нэг болжээ. Энэ хугацаанд олон ч шилдгүүдтэй хамтран тоглож, том тэмцээнүүдийг түрүүг хүртэж байв.

Тэгвэл Secret багт нэгдсэн монгол тамирчдаа танилцуулъя.

А.Билгүүн – 423

Анх Lilgun багаас мэргэжлийн тамирчны замналаа эхлүүлсэн тэрбээр сүүлд Филиппиний "Execration" багт зээлээр тоглосон. Өдгөө 21 настай түүний "IHC Esports" багтай эхлүүлсэн аялал яг нэг жилийн дараа өндөрлөж байгаа нь энэ. Түүний хувьд Ханжоугийн Азийн наадмаас багийнхаа хамтаар мөнгөн медаль хүртэж, Монголын цахим спортын түүхэн дэх гайхалтай амжилтын эзэн болсон билээ.

"Lilgun" баг 2023 оны дөрөвдүгээр сард бүтцийн өөрчлөлт хийн IHC Esports гэх нэртэй болсон билээ.

Б.Мөнхжин – Seimei

"Renewal", "Tough" зэрэг монгол багуудаар тоглож явсан Б.Мөнхжин удахгүй 22 нас хүрнэ. Түүний хувьд сүүлд Монголын "123" багт тогложээ.