ОХУ-ын ерөнхийлөгч Путин Бямба гаригт Хойд Солонгостой харилцан батлан хамгаалах тухай заалт бүхий стратегийн түншлэлийн гэрээнд гарын үсэг зуржээ. Пёньянд өнгөрсөн зургадугаар сард болсон дээд хэмжээний уулзалтын дараа Путин, Ким Жон Ун нар аль нэг улсад нь зэвсэгт халдлага гарсан тохиолдолд бие биедээ туслах тухай харилцан тохирсон. Тус гэрээг ОХУ-ын доод танхим өнгөрсөн сард, дээд танхим энэ долоо хоногт тус тус соёрхон баталжээ. Улмаар соёрхон батлах тухай зарлигт Путин гарын үсэг зурсан нь энэ юм.

Энэхүү гэрээ нь ОХУ, Хойд Солонгосын харилцааг улам нягтруулж байна. Хойд Солонгосоос ОХУ-д зэвсэг нийлүүлсэн гэж Өмнөд Солонгос болон барууны орнууд батлаад буй. Украины шүүх эмнэлгийн шинжээчид Оросын халдлага болсон газраас зэвсгийн ул мөрийг олсон гэж мэдэгдсэн билээ. Түүнчлэн Хойд Солонгосын цэргүүд хэдийнэ Оростой нэгдэн Украинд тулалдаж байна. Гэхдээ хойд солонгос цэргүүд ирсэн гэдгийг ОХУ албан ёсоор батлаагүй байна.

Курскийг эргүүлэн авахаар Орос, Хойд Солонгосын 50 мянга орчим цэрэг цуглараад буйг АНУ, Украин мэдэгджээ. Украины эх сурвалжийн мэдээлснээр Хойд Солонгосын цэргүүд дайралт болон туслах анги гэсэн хоёр бүлэгт хуваагдсан аж. Хойд Солонгос асар том армитай ч Оросоос ялгаатай нь олон 10 жилийн турш хуурай замын байлдаанд оролцоогүй. Гэхдээ өдгөө Украинд хамгийн шилдэгүүд нь ирсэн гэж үзэж байна. Тэднийг Хойд Солонгосын тусгай ажиллагааны цэргүүд байрладаг 11-р корпусаас татагдсан гэж үзжээ.

Дайны судалгааны хүрээлэнгийн шинжээч Жорж Баррос "Хойд Солонгосын арми туршлагагүй хэдий ч зохион байгуулалт сайтай. Тэдний оросуудаас илүү байж болох цорын ганц зүйл нь эв нэгдэл, сахилга бат юм" гэжээ.