Өнгөрсөн долоо хоногийн Ням гаригт Берлин хотноо "CS2"-ийн нэгэн сонирхолтой, чухал тэмцээн боллоо. Тус тэмцээнд Монголын The MongolZ баг түрүүлж, 500 мянган ам.долларын эзэд болов. Энэхүү ялалт, түрүү нь The MongolZ баг болон тэдний хамтрагч байгууллага 1xBet-ийн хувьд түүхэн амжилт болсон нь хэд хэдэн шалтгаантай.

ЯМАР ТЭМЦЭЭН БОЛСОН БЭ?

Thunderpick World Championship тэмцээн нь өнгөрсөн аравдугаар сарын 21-нээс арваннэгдүгээр сарын 3-ны өдрүүдэд онлайн, арена гэсэн хоёр төрлөөр боллоо. Дэлхийн CS-ийн өнөө цагийн өнгийг тодорхойлж буй шилдэг 16 баг оролцсон. Мэдээж The MongolZ баг битүү мориор нэрлэгдэж, Heroic, Virtus.pro, BIG болон 3DMAX гэсэн шилдгүүдтэй цомын төлөө өрсөлджээ. Мөн энэ тэмцээний онцлох тамирчин нь домогт Александр Костилиев буюу "s1mple" байв. Түүний хувьд хэсэг хугацаанд CS-ээс завсарлаж, эргэн ирсэн. Түүний шинэ баг нь Falcons билээ.

The MongolZ тэмцээнээ эрчтэй эхлүүлсэн. Тэд хэсгийн шатны нээлтийн тоглолтдоо Cloud9-ийг, дараа нь Fnatic-ийг тус тус өвдөг шороодуулсан. The MongolZ-ийг ганц барьц алдуулсан нь Imperial Esports баг гэж ойлгож болно. Хоёр багийн тоглолт эхлээд Mirage дээр болоход Бразилын баг ялалтыг авсан ч The MongolZ баг Dust2 болон Inferno дээр дараалан ялж, дараагийн шатанд шалгарчээ. Хагас шигшээд тэд эртний танил Францын 3DMAX-ийг 2-0 гэсэн харьцаатай хожиж, финалд хүрэв.

Финалд The Mongolz болон Heroic гэсэн хоёр баг учраа таарсан. Дан ганц багуудын тулаан бус ард нь байх спорт бооцооны хамтрагч байгууллагуудын тулаан болсон гэхэд хилсдэхгүй. 1xBet-ийн эсрэг Thunderpick. Эхний мап дээр The MongolZ ялсан ч Ancient дээр Heroic хариуг нь барьсан. Гэхдээ л монголчууд дараалан Anubis, Mirage дээр хожиж, аваргын цомыг хүртсэн түүхтэй.

THE MONGOLZ ЯМАР ШАГНАЛ ХҮРТСЭН БЭ?

Юуны түрүүнд The MongolZ-ийн гайхалтай түрүүг багийн ахлагч Б.Гарьдмагнай буюу "bLitz"-тэй холбох хэрэгтэй. Тэрбээр энэхүү тэмцээний шилдэг нь болсон. Баг нь ч Valve-ийн чансаагаа ахиулж, есдүгээр байраас тав руу дэвшжээ. Тэд дан ганц Монгол гэлтгүй бүс нутгийнхаа итгэл найдварыг тээж байгаа бөгөөд дэлхийн топ 20 багийн тоонд орж буй ганц Ази баг билээ.

Хоёрдугаарт, The MongolZ баг 500 мянган ам.долларын эзэд болсон. Тэд өмнө нь YaLLa Compass дээр түрүүлж, мөн 200 мянган ам.доллар хүртсэн амжилттай. Тус багийн 2024 оны шагналын орлого нь 1 сая ам.доллар давав. Энэ амжилтаараа Vitality, FaZe Clan, MOUZ зэрэг шилдгүүдийг ардаа хаяжээ.

Гуравдугаарт, The MongolZ-ийн өөрсдөдөө итгэх итгэл. Тэд ирэх долоо хоногт Ази, Номхон далайн бүс нутгийн RMR тэмцээнд өрсөлдөнө. Тус бүс нутгаас нийт гурван баг Шанхайн Мэйжорыг зорих учиртай. Ямартай ч The MongolZ дахин нэг удаа Ази, Номхон далайн бүс нутгийн тэргүүн баг гэдгээ харуулахаар Шанхайг зорьсон.