Израилийн хөл бөмбөгийн фанатууд Амстердам хотод халдлагад өртөж, хамар нь хугарч гэмтэл авсан байна. Тодруулбал, 24 настай Ади Реубен тэмцээний дараа зочид буудал руугаа буцаж явахдаа 10 гаруй хүнд зодуулжээ. Тэрбээр найзуудтайгаа явж байсан ч танихгүй эрэгтэйчүүд хүрээлэн авч зоджээ. Тухайн танихгүй хүмүүс эхлээд Реубен болон түүний найзуудыг аль улсаас ирснийг нь асуусан байна. Реубен "Израиль" гэх үед нь өшиглөж, цохиж эхэлсэн бөгөөд "Хараал идсэн еврей нар"," IDF" буюу Израилийн батлан хамгаалах хүч гэж хашхирч эхэлжээ. Эргүүл хийж байсан цагдаа нар Реубен болон найзуудыг нь аварч чадсан.

Гэсэн хэдий ч израильчуудын эсрэг суртал ухуулга, Израиль хүнийг цохиж, зодоод зугтах антисемит хэрэг гарах нь олширсон тул үргэлж хамгаалах боломжгүй гэдгийг Амстердамын цагдаагийн алба хаагчид хэлсэн байна.

"Тэд намайг элдвээр хэлж, түлхэх үед л зугтах ёстойг мэдсэн. Гэхдээ бид хаашаа явахаа мэдээгүй. Гадаа түнэр харанхуй байсан учир танихгүй хүмүүсийн нэг нь намайг бас найзуудыг минь түлхэж унагаасан. Тэд биднийг хөлөөрөө дэвсэлж ‘Хараал идсэн Израиль. Палестиныг чөлөөл’ гэж орилж байсан" гэж Реубен мэдүүлжээ. Мөн "Гэнэт хамар минь маш их өвдөж, цус гарсан. Цагдаа нар ирсний дараа тэр хүмүүс бүгд зугтсан. Би бараг 30 минут юу ч харж чадаагүй" гэв. Цагдаа нар Реубен болон найзуудыг нь эмнэлэгт хүргэж өгөхийг хүссэн ч татгалзсан байна.

"Учир нь Амстердамын энгийн иргэд хүссэн үедээ Израиль хүнийг зодож байгаа учир эмнэлгийн ажилчид өөр, аюултай зүйл хийх вий гэдгээс айсан" гэж Реубен хэлжээ.

Тэрбээр найзуудын хамт Баасан гаригт Израиль руу буцаж, харьяа эмнэлэгтээ эмчилгээ хийлгэхээр болсон байна. Ойрхи Дорнодод болж буй хурцадмал байдлаас үүдэн Израилийн энгийн иргэд гаднын орнуудад зодуулж, доромжлуулах болжээ. Лондон, Берлин зэрэг томоохон хотуудад Израилийн эсрэг суртал ухуулга тараах бүлгэм ихэссэнээр тус улсын энгийн иргэд хохирох тохиолдол бүртгэгдэж буй. Энэ талаар Израилийн ерөнхий сайд тодорхой арга хэмжээ авч чадахгүй байгаа ч АНУ антисемит үзэл гаргасан хүмүүст хариуцлага тооцох болсон байна.

Гэвч энэ нь зөвхөн АНУ дотор үйлчлэх тул гаднын орнуудад хэрэгжихгүй байгаа бололтой.