Хүн дайрч, зугтаасан Land-200 маркийн автомашины жолоочийг олжээ

Яргайтын замд байрлах Зуслангийн хэрэглэгчдэд үйлчлэх төвийн ойролцоо авто машинд дайруулсан хэрэг өчигдөр /2024.11.07/ гарчээ. Тодруулбал шөнийн 01:20 цагт Цагдаагийн байгууллагад хэргийн талаар дуудлага, мэдээлэл бүртгэгдсэн байна. Дуудлагын дагуу Цагдаагийн байгууллагаас шалгалтын ажиллагаа явуулахад 44 настай иргэн “Toyota Land-200” маркийн тээврийн хэрэгсэл жолоодож яваад 28 настай эмэгтэйг мөргөж, амь насыг нь хохироосон нь тогтоогджээ.

Түүнчлэн хэрэгтэн ослын газрыг орхиж, зугтаан нийслэлийн Сүхбаатар дүүрэгт жолоодож явсан тээврийн хэрэгслээ нуусан байсныг олж, хойшлуулшгүй ажиллагааны хүрээнд нөхөн үзлэг хийж, шалгалтын ажиллагааг үргэлжлүүлэн явуулж байгаа аж.

Замын хөдөлгөөний дүрмийн 3.4-т жолооч нь хүний амь нас, эрүүл мэнд, эд хөрөнгөд ноцтой хохирол учирсан байж болзошгүй зам тээврийн ослын тохиолдол харсан даруйд очиж бололцоотой тусламж үзүүлэх, цагдаа, эмнэлгийн байгууллагад яаралтай мэдэгдэх, зам тээврийн осолд өртсөн хүнд эмнэлгийн анхны тусламж үзүүлэх, түүнийг эмнэлэгт яаралтай хүргэх үүрэгтэй гэж заасан байдаг.