Өмнөд Солонгосын тэргүүн хатагтай Ким Кён Хи өнгөрсөн оны есдүгээр сард Кристиан Диор брэндийн гурван сая воны үнэтэй цүнх бэлгэнд авсан нь эрх баригч нам дотор хагарал үүсгэж, улс орныг шуугиулсан билээ. Улмаар тус улсын Прокурорын мөрдөн байцаах хэсэг тэргүүн хатагтайг цагаатгах шийдвэр гаргаснаа энэ оны наймдугаар сарын 21-нд мэдэгдсэн. Тэргүүн хатагтайн пастор Чой Жэ Ёноос авсан цүнх ерөнхийлөгч Юн Сук Ёлын үүрэгт ямар ч хамааралгүй гэж мөрдөн байцаалтын багийнхан дүгнэжээ. Мөн уг цүнхийг хувь хүмүүс харилцан талархал илэрхийлэхийн тулд солилцсон бэлэг гэж үзсэн байна.

Ерөнхийлөгч Юн Сук Ёл Пүрэв гаригт энэ хэрэгтэй холбоотой мэдэгдэл хийжээ. Тэрбээр эхнэртэй нь холбоотой аливаа дуулиан шуугианы төлөө уучлал гуйгаад Ким Кён Хиг биеэ зохистой авч явах ёстой байсан гэжээ. Үүний зэрэгцээ эхнэрийг нь хэт чөтгөр шулам мэт харагдуулж, хэтийдүүлсэн зүйлс ч байсныг хэлэв.

Тэргүүн хатагтайн үйл хөдлөлийг шалгах хүсэлтийг ерөнхийлөгчид тавьсан ч тэр хүлээж аваагүй. Гэхдээ тэргүүн хатагтайн албан үүргийг хариуцах алба байгуулна гэж мэдэгджээ.

Юн Сук Ёл энэ оны хоёрдугаар сард Диор цүнхний хэргийн талаар дурдахдаа "улс төрийн зорилготой үйлдэл" гэж нэрлээд, уучлал гуйгаагүй байсан. Тухайн үед Өмнөд Солонгосын сөрөг хүчний Ардчилсан нам Юн Сук Ёлыг итгэж найдаж болохооргүй ичгэвтэр хандлага гаргасан гэж шүүмжилсэн юм.