17 настай Жиан Пинийг Хятад даяар гоц ухаантан гэж нэрлэж байв. Жиансу мужаас гаралтай тэрбээр өнгөрсөн зургадугаар сард "Алибаба" группээс зохион байгуулдаг олон улсын математикийн уралдааны сонгон шалгаруулалтад 12 дугаар байранд оржээ. Гэвч Жиан Пин шалгалтын үеэр хуулсан нь илэрч, хүмүүсийн дунд олон сар үргэлжилсэн эргэлзээ тайлагдав.

"Алибаба" групп тус уралдааныг 2018 оноос хойш зохион байгуулсан бөгөөд зэрэглэл доогуур сургуулийн оюутан анх удаа финалд шалгарсан нь Жиан Пин байжээ. Финалд 800 оюутан шалгарсны дийлэнх нь элит сургуулиудаас ирсэн байв. Тэрбээр Бээжингийн их сургууль, Массачусетсийн Технологийн дээд сургууль, Оксфордын их сургууль зэрэг дэлхийн хамгийн нэр хүндтэй сургуулиас ирсэн оюутнуудаас оноогоор илүү гарчээ.

Жиан Пиний амжилтын тухай мэдээлэл нэг шөнийн дотор л гэрлийн хурдаар тарж, түүнийг "гайхамшиг" гэсэн алдрын эзэн болгосон юм.

Хятадын боловсролын тогтолцоо чанга хатуу гэдгээрээ алдартай. Ийм нөхцөлд Жиан Пин амжилт гаргасан нь энгийн сургуулийн хүүхдүүд ч академик түвшинд суралцаж буйн нотолгоо болсон юм. Гэвч үүний зэрэгцээ түүний амжилтад эргэлзэгсэд ч гарсан. Эцэст нь тэмцээний зохион байгуулагчид өнгөрсөн Ням гаригт Жиан Пинийг багшаасаа тусламж авч, тэмцээний дүрмийг зөрчсөн гэж зарлажээ. Багш нь ч бас тус тэмцээнд оролцсон ажээ.

Тэмцээний эцсийн шатанд 86 хүн шалгарсан боловч Жиан Пин ч, багш нь ч үүнд багтаагүй.

Жиан Пиний амжилтыг улс даяар шагшин магтаж, телевизийн нэвтрүүлгүүдэд ч оролцсон. "Математикаар хичээллэх амаргүй. Гэхдээ бодлогын ард гарах тоолондоо би аз жаргалтай болдог. Ирээдүйд юу ч болдог байлаа гэсэн би суралцсаар л байх болно" гэж тэр хэлжээ.