Оросын бодлого тодорхойлогчдын уулзалт аравдугаар сард болж өнгөрсөн. Үүний дараа тус улсын Төв банк арванхоёрдугаар сараас эхлэн бодлогын хүүгээ өсгөх магадлалтай байгааг илтгэж, инфляцийг зорилтот түвшнээс хол давсан хэвээр байгааг онцолжээ. Өнгөрсөн сарын сүүлээр тус улсын банкны үндсэн хүү 20 хувиасаа нэмэгджээ. Төв банкны ерөнхийлөгч Эльвира Набиуллина үүнийг тайлбарлахдаа "Батлан хамгаалахаас үүдэлтэй инфляци өсөхийн хэрээр мөнгөний бодлого өөрчлөгдөх шаардлагатай байгаа" гэж тайлбарласан юм.

Бодлого тодорхойлогчдын уулзалтын тойм Лхагва гаригт нийтлэгдсэн бөгөөд ихэнх оролцогч инфляцийн эрсдэл нэмэгдэж байгаатай холбогдуулан "хатуу дохио өгөх" шаардлагатай гэсэн байна. Улмаар тус улс эдийн засгийн хямралыг даван туулах болоогүйг тодорхойлсон гэж "The Moscow Times" мэдээлэв.

"Дараагийн хурал хүртэл хүүгийн өсөлтийг тогтоогоогүй байгаа. Гэхдээ хүү өсөх нь тодорхой" гэж Төв банк онцолжээ. Бодлого боловсруулагчид арванхоёрдугаар сарын 20-нд дахин хуралдаж, хүүгийн дараагийн зохицуулалтыг шийдэхээр төлөвлөж байна. Хуралдааны хураангуйгаас харахад өнгөрсөн сарын хэлэлцүүлгээр бодлогын хүүг 20 хувиас 22 хувь хүртэл өсгөсөн байна. Энэ нь өмнөх хүүгийн өсөлтөөс нэмэгдсэн үзүүлэлт аж. ОХУ-ын Төв банкны мэдээлснээр, наймдугаар сард хүү 7.5 хувь байсан бол есдүгээр сард 9.8 хувь болж өссөн байна. Үүний зэрэгцээ суурь инфляци мөн хугацаанд 7.7 хувь байсан бол 9.1 хувь болж өсчээ.

Ерөнхийлөгч Владимир Путин 2022 оны хоёрдугаар сард Украин руу цэргээ илгээснээс хойш Орос улс үнийн тогтворгүй байдалтай тулгарсан. Улмаар барууны орнуудын хориг арга хэмжээнд орж, дотоодын эдийн засаг савлагаатай болсон. Москва Украины дайнд зориулж зэвсгийн үйлдвэрлэлээ эрчимжүүлснээр батлан ​​хамгаалахын зардал мөн огцом өссөн юм.