Германы канцлер Олаф Шольц Лхагва гаригт Сангийн сайдаа огцруулж, засгийн газар нь уналтын ирмэгт ирээд байна. Энэ талаар Шольц телевизээр ярихдаа, "Сангийн сайд Кристиан Линднерийг манай улсад хохирол учруулахаас урьдчилан сэргийлэх шаардлагатай учир огцруулсан" гэж мэдэгджээ.

Эвслийн засгийн газрын гишүүд болох Социал демократ намын Шольц, Чөлөөт ардчилсан намын Линднер, Ногоон намын Роберт Хабек нар урт хугацаанд улс төрийн нууцлаг маргаантай байжээ. Шольцын мэдэгдлийн дараа Чөлөөт ардчилсан нам Линднерийг эвслээс гарсан гэж мэдэгдсэн байна. Шольц нэгдүгээр сарын 15-нд илтгэлийн санал хураалт явуулж, гуравдугаар сарын эцэс гэхэд сонгууль явуулахаар төлөвлөсөн. Тэрбээр нэгдүгээр сарын 15-ныг хүртэл албан тушаалаа хэвээр хадгалж, чухал хууль тогтоомжуудыг гаргах болно гэдгээ илэрхийлсэн ба эдийн засаг, батлан ​​хамгаалахтай холбоотой хуулиудыг Христийн ардчилсан холбооны сөрөг хүчний удирдагч Фридрих Мерцтэй ярилцан, батлах болжээ.

Дээрхи үйл явдлуудыг "гэрлэн дохионы хямрал" гэж нэрлэдэг аж. Энэ нь улаан, шар, ногоон өнгийг төлөөлөх намуудын маргааныг илэрхийлнэ. Тодруулбал, Германы эдийн засгийн ирээдүйн талаар эвслийн түншүүд санал зөрөлдөж, маргалдахыг хямрал гэж нэрийдээд буй.

Сангийн сайд, Чөлөөт ардчилсан намын гишүүн Кристиан Линднер өнгөрсөн долоо хоногт 18 хуудас бүхий эдийн засгийн төлөвлөгөөг нийтэлснээр асуудал эхэлсэн юм. “Германы эдийн засгийн эргэлт” гэсэн гарчигтай баримт бичиг нь ихээхэн хурцадмал байдал үүсгэв. Үүнд Германы эдийн засгийн хүчирхэг байр суурийг хамгаалахын тулд татварыг бууруулж, бодлогод томоохон өөрчлөлт хийхийг уриалсан байжээ. Энэ нь эвслийн хамтрагчид болох Социал демократ болон Ногоон намын үзэл бодолтой зөрчилдөж байгаа юм.

Зарим хүмүүс тухайн нийтлэлийг засгийн газрын бодлого гэхээсээ илүүтэй улс төрийн кампанит ажлын стратеги гэж бодсон. Товчхондоо, Линднерийн эдийн засгийн төлөвлөгөө нь түүнийг ирээдүйн сонгуульд бэлдэж, одоогийн эвслийн дотор хурцадмал байдал санаатайгаар үүсгэж буйн шинж гэж үзсэн юм.